गर्दीमुळे दोन प्रवाशांमध्ये हाणामारी

गर्दीमुळे दोन प्रवाशांमध्ये हाणामारी
बदलापूर स्थानकातील घटना मोबाईलमध्ये कैद

बदलापूर, ता. १० (बातमीदार) : बदलापूर रेल्वेस्थानकात गर्दीमुळे धक्काबुक्की झाल्याने दोन प्रवाशांमध्ये हाणामारी झाल्याची घटना मंगळवारी (ता. १०) सकाळी साडेआठच्या सुमारास घडली. यात कोणालाही मोठी दुखापत झाली नाही; मात्र वाढत्या गर्दीचे अजून कोणते परिमाण सहन करावे लागणार, असा प्रश्न बदलापूरकर विचारत आहेत.

सकाळी साडेआठच्या सुमारास कर्जतहून मुंबईच्या दिशेने जाणाऱ्या लोकलमधून बदलापूर स्थानक येताच गर्दीतून वाट काढत दोन प्रवासी उतरले. या वेळी गर्दीमुळे लोकलमध्ये झालेल्या धक्काबुक्कीतून दोघांमध्ये सुरुवातीला वाद झाले. त्यानंतर स्थानकातच या दोन प्रवाशांमध्ये हाणामारीसुद्धा झाली. दरम्यान, इतर प्रवाशांच्या मध्यस्थीने ही मारामारी थांबली तरी, वाढत्या गर्दीमुळे असे हाणामारीचे प्रकार घडत असल्याने बदलापूरकर रेल्वेच्या फेऱ्या वाढविण्याची मागणी करीत आहेत. वाढती गर्दी आणि त्या तुलनेत लोकल फेऱ्यांचा तुटवडा यामुळे बदलापूरकरांना कोणकोणत्या स्थितीला सामोरे जावे लागणार, असा सवाल संतप्त बदलापूरकर विचारत आहेत. दरम्यान, संबंधित घटनेनंतर रेल्वे पोलिसांनी याप्रकरणी गुन्हा दाखल केल्याची माहिती समोर येत आहे.