अभिनेता शशांक केतकर याने व्यक्त केला संताप

बेकायदा पार्किंगवर शशांक केतकर संतापला
सकाळ वृत्तसेवा
ठाणे, ता. १३ : ठाणे पालिका क्षेत्रात दिवसेंदिवस वाहतूक कोंडीसह बेकायदेशीरपणे वाहन पार्किंग करण्यावरून सर्वसामान्यांसह आता, कलाकारांनादेखील मनस्ताप सहन करावा लागत आहे. अशातच वसंतविहार या ठिकाणी बेशिस्त पद्धतीने उभ्या केलेल्या वाहनाचा व्हिडिओ अभिनेता शशांक केतकर याने समाजमाध्यमावर प्रसारित केला आहे. यामध्ये एखाद्याचा जीव गेल्यानंतरच उपाययोजना होत असल्याची खंत त्याने व्यक्त केली.
ठाणे शहरात दिवसेंदिवस वाहनांची संख्या वाढत असून, वाहनतळांची संख्या अपुरी पडत आहे. त्यामुळे अनेक रस्त्यांवर चालक बेशिस्तपणे वाहन पार्क करत असतात. त्यामुळे वाहतूक कोंडीत भर पडते. अशातच शहरातील काही ठिकाणी बेकायदेशीररित्या दोन मार्गिकेपर्यंत ही वाहने उभी केली जातात. त्यामुळे अनेकदा वाहतूक कोंडी, तर अपघात होण्याची शक्यतादेखील वर्तवली जात आहे. पादचाऱ्यांना याचा सर्वाधिक त्रास होत असतो. त्यातच काही दिवसांपूर्वी प्रसिद्ध दिग्दर्शक विजू माने यांनीदेखील कॅडबरी जंक्शनजवळील वाहतूक कोंडीसंदर्भात त्यांच्या समाजमाध्यमावर संताप व्यक्त केला होता. त्यानंतर आता शशांक केतकर यानेही त्याच्या फेसबुक पेजवर वसंत विहार येथील दुहेरी पार्किंगसंदर्भात संताप व्यक्त केला आहे. अशा दुहेरी पार्किंग समस्येवर उपाय तेव्हाच होतो, जेव्हा कोणाचा तरी जीव जातो, अशी संतापजनक प्रतिक्रिया केतकरने या व्हिडिओद्वारे दिली आहे.