मटका खेळणाऱ्या पाचजणांवर गुन्हा

भिवंडी, ता. १४ (वार्ताहर) ः शहरातील अजंठा कंपाउंड येथील मोकळ्या गल्लीत मटका खेळणाऱ्या पाच जणांवर भोईवाडा पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, भिवंडी गुन्हे शाखेच्या पथकाने केलेल्या कारवाईत मटका अड्डाचालक संजय पाटील, रायटर अख्तर अनार शेख यांना पोलिसांनी ताब्यात घेतले आहे. त्यांच्याकडून १,४०० रुपये रोख रक्कम मटक्यासाठीच्या पावत्या, एक पुस्तक असे साहित्य जप्त करण्यात आले आहे. तसेच अख्तर शेख, दाऊद खान, उमेश गुडके, अविनाश खाडे या चौघांना ताब्यात घेतले आहे. याप्रकरणी भोईवाडा पोलिसांनी महाराष्ट्र जुगार कायद्याप्रमाणे गुन्हा दाखल करून सर्वांना नोटीस बजावून सोडून दिले आहे.