रस्त्याचे दोन भाग होऊन अडकला टेम्पो

रोहा, ता. १५ (बातमीदार) : रोहा तालुक्यातील दुर्गम भागात वसलेल्या विठ्ठलवाडी परिसरातील गारभट येथे मुसळधार पावसाने मुख्य रस्ता खचला. या रस्त्यात येथून मार्गस्थ होणारा एक टेम्पोही अडकून पडल्याची घटना रविवारी (ता. १५) घडली. या अपघातात टेम्पोचालक बचावला असून, वाहनाचे नुकसान झाले आहे.
मुंबई-गोवा राष्ट्रीय महामार्गावरील पुगाव नम्रता ढाबा ते गारभट विठ्ठलवाडी याअंतर्गत असलेल्या रस्त्यावरून दिवसभर वाहनांची रहदारी सुरू असते. हा रस्ता गारभट येथून पुढे पाली नांदगाव येथे मिळाला आहे. हा संपूर्ण परिसर निसर्गरम्य असल्याने या परिसरात ठिकठिकाणी फार्महाउस व रिसॉर्ट बांधण्यात आले आहेत. पावसाळ्यात येथील डोंगरदऱ्यांत फेसाळणारे धबधबे पर्यटकांना आकर्षित करीत असतात. त्यामुळे येथे रहदारी वाढली आहे. पावसाळ्यात येथील रस्ता खचणे, दरड-झाडे कोसळणे अशा घटना घडत असतात. शनिवारी दुपारपासून कोसळलेल्या मुसळधार पावसामुळे गारभट हद्दीतील उतारावरील रस्ता खचला आहे. त्याच दरम्यान येथून मार्गस्थ होणारा मालवाहू टेम्पो येथील परिस्थितीचा अंदाज न आल्याने रस्त्यातच अडकून पडला आहे. या घटनेत टेम्पोचालक बचावला असून टेम्पोचे मोठे नुकसान झाले आहे.

रोहा : कोलाड विभागातील विठ्ठलवाडी परिसरात गारभट येथे रस्ता खचून त्यात टेम्पो अडकून पडला.