‘रंगाक्षरे पावसाची’ उपक्रमाला प्रतिसाद

‘रंगाक्षरे पावसाची’ उपक्रमाला प्रतिसाद
मुलुंड, ता. १६ (बातमीदार) ः पावसाळ्याच्या आगमनाची चाहूल लागली, की प्रत्येकजण वेगळी आणि उठावदार छत्री मिळवण्याच्या शोधात असतो. आपली छत्री सर्वात आकर्षक आणि खास दिसावी, यासाठी अनेक जण नवनवीन कल्पनांना मूर्त रूप देतात. याच कल्पनाशक्तीला वास्तवात उतरवण्यासाठी भांडुपमधील उत्साही मित्र मंडळाने ‘रंगाक्षरे पावसाची’ हा आगळा-वेगळा उपक्रम कोकणनगर येथे रविवारी (ता. १५) साकारला.
या उपक्रमात छत्र्यांवर कॅलिग्राफी आणि चित्रकला यांचे मोफत प्रशिक्षण देण्यात आले. विशेष म्हणजे, या कलात्मक उपक्रमात २०० हून अधिक कलाकारांनी आपल्या सहभागाने रंग भरले. छत्र्यांवर विविध रंगसंगती वापरून अक्षरलेखन आणि चित्रकलेच्या माध्यमातून स्वतःची सृजनशीलता व्यक्त करण्याची संधी कलाकारांना यानिमित्ताने मिळाली.
प्रसिद्ध चित्रकार महेश काडगे यांनी मार्गदर्शन करीत लहानग्‍यांपासून मोठ्यांपर्यंत सर्वच सहभागी कलावंतांना रंगसंगतीचे भान, आकर्षक अक्षरशैली आणि सौंदर्यपूर्ण रचना याचे मौल्यवान धडे दिले.