अंबरनाथ पालिकेचा सुरक्षा रक्षक बनला वकील!

अंबरनाथ, ता. १७ (वार्ताहर) : अंबरनाथ नगरपालिकेमध्ये सुरक्षा रक्षक म्हणून कार्यरत असलेले विजय गोविंद शेलवले यांनी पालिकेने गोरगरीब विद्यार्थ्यांसाठी बांधलेल्या वाचनालयातील पुस्तके वाचून एलएलबी पदवी परीक्षा फर्स्ट क्लासमध्ये उत्तीर्ण केली आहे. नुकताच एलएलबीचा निकाल जाहीर झाला आहे. नगरपालिकेचे मुख्याधिकारी उमाकांत गायकवाड यांनी त्यांचे कौतुक करत पुष्पगुच्छ देऊन सत्कार केला. आपल्या या यशात परिवाराचे मोठे योगदान असून, पुढे सराव सुरू करण्याचे त्यांचे मानस आहे.
नवनिर्वाचित ॲड. विजय शेलवले हे अंबरनाथ नगरपालिकेत सुरक्षा रक्षक मंडळ, बृहन्मुंबई आणि ठाणे यांच्यातर्फे कंत्राटी सुरक्षा रक्षक म्हणून १० वर्षांपासून नोकरी करत आहेत. त्यांचे वडील दिव्यांग असूनही त्यांनी दहावीपर्यंतचे शिक्षण १९४६ मध्ये पूर्ण केले. आपल्या वडिलांचा हा संघर्ष त्यांनी डोळ्यासमोर ठेवला होता. कर्तव्यावर असताना शेलवले यांना अनेकदा पालिकेने बांधलेल्या वाचनालयात सुरक्षा रक्षक म्हणून हजेरी लावावी लागली. याच वेळी त्यांचा अनेक गोरगरीब विद्यार्थ्यांशी संपर्क होत गेला. या विद्यार्थ्यांना पाहून त्यांना प्रेरणा मिळत गेली. याच प्रेरणेतून त्यांनी वाचनालयातील पुस्तके वाचून आपले पदवीचे शिक्षण पूर्ण केले. तसेच पदवी पूर्ण झाल्यानंतर एलएलबीसाठी प्रवेश प्रक्रिया पार करत त्यांनी वकिलीचे शिक्षण घेतले. चारच दिवसांपूर्वी एलएलबीचा निकाल जाहीर झाला. शेलवले हे फर्स्ट क्लासमध्ये उत्तीर्ण झाले आहेत. यापुढे त्यांना वकिलीचा सराव करण्याची इच्छा असून, ते यासंदर्भात पालिका मुख्याधिकारी व सहकाऱ्यांशी चर्चा करून पुढे सराव सुरू करणार असल्याचे सांगितले. या वेळी नगरपालिकेतील कर अधीक्षक नरेंद्र संख्ये यांनीही ॲड. विजय शेलवले यांचा पुष्पगुच्छ देऊन सत्कार केला. अंबरनाथ नगरपालिकेतील सुरक्षा विभागातील किशोर फुलोरे, काशिनाथ भोये, किशोर भोर, प्रशांत सज्जनवार, जगदीश तुपे, अजय आंग्रे, इतर सुरक्षा अधिकारी व कर्मचारी उपस्थित होते.

पालिकेने बांधलेल्या वाचनालयामुळे गोरगरीब विद्यार्थ्यांना आणि ज्यांना शिक्षणाची आवड आहे; मात्र परिस्थितीअभावी शिक्षण घेता येत नाही, अशा विद्यार्थ्यांना याचा मोठा फायदा होत आहे. तत्कालीन मुख्याधिकारी प्रशांत रसाळ यांचे विशेष आभार मानतो.
- विजय शेलवले, सुरक्षा रक्षक

आपल्या कामाच्या जबाबदाऱ्यांबरोबरच एलएलबीसारखी प्रतिष्ठित पदवी पूर्ण करून खरोखरच एक प्रेरणादायक उदाहरण शेलवले यांनी दिले आहे. ही मेहनत, चिकाटी आणि शिक्षणावरील निष्ठा प्रत्येक कर्मचाऱ्याने आत्मसात करण्यासारखी आहे. इच्छाशक्ती, जिद्द व अंगी मेहनत असली तर सर्व काही मिळते. शेलवले यांना पुढील भविष्यासाठी शुभेच्छा.
- उमाकांत गायकवाड, मुख्याधिकारी