तर एकास दारू साठी पैसे न दिल्याने मारहाण

भिवंडीत चाकूहल्ल्‍यामध्ये तीन जखमी
भिवंडी, ता. १७ (वार्ताहर)ः शहरातील वेगवेगळ्या भागांत तीन चाकूहल्याच्या घटना घडल्या असून, त्यामध्ये तीन जण जखमी झाले आहेत. भिवंडी शहर पोलिस ठाणे हद्दीत कामतघर-ताडाळी रस्त्यावरील हनुमाननगर येथे रस्त्यावर शुक्रवारी (ता. १३) सायंकाळी परिसरातील दीपक कोळी या गुंडाने रिक्षाचालक केदार लुक्का जोशी (वय ५७, रा. ओवळी) यांना शिवीगाळ करीत त्यांच्यावर सुऱ्याने वार केले. यामध्ये ते गंभीर जखमी झाले आहेत. याप्रकरणी भिवंडी शहर पोलिस ठाण्यात रविवारी (ता. १५) गुन्हा नोंदवला.
दुसरी घटना शांतिनगर पोलिस ठाण्याच्या हद्दीत घडली. अवचितपाडा परिसरात सुफीयान मशरक हुसेन अन्सारी या युवकास रविवारी सायंकाळी साडेपाच वाजण्याच्या सुमारास परिसरातील जावेद ऊर्फ लख्या सिद्दीकी याने विनाकारण शिवीगाळ सुरू केली. सुफियानने याचा जाब विचारला असता जावेदने खिशातून छोटा चाकू काढून त्यांच्या पोटात मारून जखमी केले. याप्रकरणी सुफियानने दिलेल्या तक्रारीवरून गुन्हा दाखल केला आहे.
तिसरी घटना याच परिसरात सोमवारी (ता. १६) मध्यरात्री घडली. फळविक्रेते मोहम्मद इर्शाद मोहम्मद अमीन शेख हे अवचितपाडा येथील इमारतीमध्ये राहतात. सिराज उल हक अब्दुल रहेमान अन्सारी हा मोहम्मद यांच्या घरासमोर बसल्याने त्यांच्या पत्नीने घराजवळ बसू नको, असे सांगितले. या गोष्टीचा मनात राग धरून अन्सारीने मोहम्मद यांच्या घरात घुसून चाकूने त्यांच्या पत्नीवर वार करून गंभीर जखमी केले. याप्रकरणी मोहम्मद यांच्या तक्रारीवरून शांतिनगर पोलिस ठाण्यात गुन्हा नोंदविला आहे.
आसबीबी येथील रुंगटा सायझिंग परिसरात यंत्रमाग कारखान्यात काम करणारे कामगार शेहजाद अशफाक खान, लल्लन शब्बीर अन्सारी या दोघांनी ओळखीचा कामगार राजू मोहम्मद जैस रायनी याकडे रविवारी दारूसाठी पैसे मागितले. राजूने पैसे देण्यास नकार दिल्याने शेहजाद अश्‍फाक खान, लल्लन शब्बीर अन्सारी या दोघांनी संगनमत करून त्याला लाकडी दांडक्याने तसेच लाथाबुक्क्यांनी जबर मारहाण केली. याप्रकरणी दोघांविरोधात गुन्हा दाखल केला आहे.