शाळांना पत्रे देत हिंदी भाषा सक्तीला विरोध

वाडा (बातमीदार) : पहिली ते चौथीपर्यंत राज्य सरकारने हिंदी भाषा सक्तीची केली आहे. त्याला महाराष्ट्र नवनिर्माण सेनेचा विरोध आहे. मनसे प्रमुख राज ठाकरे यांनी आज (ता. १८) पत्रक काढत सर्व शाळांना देण्यास सांगितले आहे. त्या अनुषंगाने पक्षाच्या वाडा तालुकातर्फे आजपासून शाळांना पत्रक देण्यास सुरुवात केली आहे. वाडा तालुक्यातील शाखा अध्यक्षांनी आपापल्या गावातील जिल्हा परिषद शाळांमध्ये पोहचवावे आणि हिंदी भाषा आम्ही महाराष्ट्रात लादू देणार नाही, असा आक्रमक पवित्रा घेतला आहे. वाडा तालुक्यातील वरले, सरसओहळ, विलकोस, कादिवली येथील जिल्हा परिषद शाळांना पत्रक देण्यात आले. या प्रसंगी मनसे वाडा तालुका अध्यक्ष कांतिकुमार ठाकरे, शहर अध्यक्ष मधुर म्हात्रे, स्वप्नील मोरे, हेमंत जाधव, ओमकार साळुंखे, करण ठाणगे, प्रणय पाटील आदी उपस्थित होते.