कोळसेवाडीतील अंतर्गत रस्त्यावर कचरा

कोळसेवाडीतील अंतर्गत रस्त्यावर कचरा

कल्याण, ता. १९ (बातमीदार) : कोळसेवाडी येथील श्री स्वामी समर्थ मठाच्या मागील भागातील रस्त्यावर कचऱ्याचे साम्राज्य पसरले आहे. हा रस्ता कमी रहदारीचा असल्याने अक्षरशः या रस्त्याला डम्पिंग ग्राउंडचे स्वरूप आले आहे. रस्त्यावरील फेरीवाले सडलेला भाजीपाला फेकतात. तसेच परिसरातील नागरिकांच्या घरातील कचरा या ठिकाणी टाकत असल्याने परिसरात दुर्गंधी पसरत आहे. त्यामुळे रस्त्यावरून जाताना नागरिकांना अक्षरश: नाक दाबून जाण्याची वेळ आली आहे. तर जवळच स्वामी समर्थ मठ आणि विठ्ठल मंदिर असल्याने भक्तांनाही नाहक त्रासाला सामोरे जावे लागत आहे.

पावसाळा सुरू झाल्याने रोगराई टाळण्यासाठी एका बाजूला महापालिका काळजी घेते, तर दुसरीकडे महापालिकेची कचऱ्यामुळे डोकेदुखी काही थांबताना दिसत नाही. काही प्रभागातील कचऱ्याची समस्या सुटली असली तरी काही प्रभागात मात्र ही समस्या कायम आहे. कोळसेवाडीतील श्री स्वामी समर्थ मठाकडे जाणाऱ्या या मार्गावरील कचऱ्यामुळे घाणीचे साम्राज्य पसरले आहे. या भागात कचरागाड्याच कचरा आणून टाकतात, नंतर पुन्हा उचलून नेतात, असा खळबळजनक आरोपदेखील नागरिक करीत आहेत.

एकादशीला भक्तांची गर्दी
आठवड्याच्या प्रत्येक गुरुवारी स्वामी समर्थ मठात शेकडो भक्त येतात. त्याचबरोबर एकादशीलाही असंख्य वारकऱ्यांची या भागात वर्दळ असते. या भक्तांच्या देवदर्शनाच्या मार्गावरच कचरा असल्यामुळे दुर्गंधीचा त्रास सहन करावा लागतो.

कचऱ्याबाबत धोरणच नाही
महापालिकेच्या गाड्या दोन-तीन दिवसांनी येऊन शक्य तितका कचरा नेतात. उचलला न गेलेला कचरा कुजून परिसरात दुर्गंधी पसरते. महापालिकेचे कचऱ्याबाबत धोरणच नाही. लोकांवर वाढीव कर लादून जो चेन्नई पेटर्न राबविला जात आहे, तो फक्त दिखाऊपणा आहे. खरंतर यांनी त्या ठिकाणी कचरा डेपो बनवला आहे. नागरिकांनी विचारणा केल्यास स्वच्छता कर्मचारीही अरेरावीची भाषा करतात. १५ दिवसांच्या आत कचऱ्याचा हा प्रश्न सुटला नाही तर तिथला कचरा सहाय्यक आयुक्तांच्या टॅबलवर नेऊन ठेवू, असा इशारा जाणीव सामाजिक संस्थेचे अध्यक्ष प्रथमेश सावंत यांनी दिला आहे.

कचरा व्यवस्थापनाचे कंत्राट असलेली कंपनी ‘४/जे’ प्रभागात आली असून गुरुवारपासून सुरळीतपणे कचऱ्याचे नियोजन केले जाईल.
- सचिन तामखेडे, सहाय्यक आयुक्त, ४/जे प्रभाग क्षेत्र क.डों.म.पा.