मांस विक्रेत्यांसाठी जनजागृती कार्यशाळा

वाशी, ता. १९ (बातमीदार) ः स्वच्छ आणि सुरक्षित कुक्कुट, शेळी, मेढी मांस उत्पादन करण्याकरिता तंत्रज्ञान विकसित करण्यात आले आहे. या तंत्रज्ञानाविषयी नवी मुंबई महापालिका कार्यक्षेत्रातील मांस विक्रेत्यांना माहिती देण्याकरिता मुंबई पशुवैद्यकीय महाविद्यालय परेल आणि नवी मुंबई महापालिका यांच्या संयुक्त विद्यमाने कार्यशाळेचे आयोजन करण्यात आले होते. कार्यशाळेमध्ये नवी मुंबई महापालिका कार्यक्षेत्रातील मांस विक्रेते मोठ्या प्रमाणात सहभागी झाले होते.
कार्यशाळेचे उद्‍घाटन महापालिका आयुक्त डॉ. कैलास शिंदे यांच्या हस्ते करण्यात आले. मुंबई पशुवैद्यकीय महाविद्यालयाचे प्राध्यापक व योजना प्रमुख डॉ. रवींद्र झेंडे यांनी स्वच्छ मांस निर्मितीसाठी विकसित तंत्रज्ञानाबद्दल मार्गदर्शन केले. त्यांनी व्यवसाय वृद्धीकरिता योग्य उपाय सांगून उपस्थित मांस विक्रेत्यांना प्रेरणा दिली. या वेळी वैद्यकीय आरोग्य अधिकारी डॉ. प्रशांत जवादे यांनी मांस उत्पादन करताना वैयक्तिक आरोग्य व ग्राहकांचे आरोग्य याकडे लक्ष देण्याचे महत्त्व विशद केले. पशुवैद्यकीय अधिकारी डॉ. श्रीकांत तोडकर यांनी टाकाऊ पदार्थांच्या पुनर्वापरातून नफा वाढवण्याचे मार्ग सुचवले आणि आधुनिक तंत्रज्ञानाच्या उपयोगाबाबत माहिती दिली. चर्चासत्रामधून व्यावसायिकांनी त्यांच्या अडचणी मांडल्या आणि तज्ज्ञांनी त्यांचे समाधानकारक निराकरण केले. सुरक्षित आणि दर्जेदार मांस उत्पादनासाठी अशा उपक्रमांची गरज यानिमित्ताने अधोरेखित झाली. या उपक्रमाच्या यशस्वी आयोजनात डॉ. विलास वैद्य, डॉ. विवेक शुक्ला, सुरेन तांबे, संतोषकुमार कोरी व इतर अधिकारी, कर्मचारी यांचे योगदान लाभले.