पनवेल पालिकेचे आठवीचे वर्ग सुरू

नवीन पनवेल, ता. २१ (बातमीदार) : पनवेल महापालिकेच्या शाळेत आतापर्यंत सातवी इयत्तेपर्यंत शिक्षणाची सोय होती. तेवढेच शिक्षण घेऊन अनेक विद्यार्थी परिस्थितीअभावी शिक्षण प्रवाहातून बाहेर पडत होते. विद्यार्थ्यांची गरज आणि पालकांची मागणी लक्षात घेता शिक्षण विभागाने पनवेल महापालिकेच्या आठ शाळांमध्ये चालू शैक्षणिक वर्षापासून आठवीचा वर्ग सुरू केला आहे. त्यामुळे जवळपास ३०० विद्यार्थ्यांची शिक्षणाची सोय होणार आहे.
पनवेल महापालिका हद्दीत महापालिकेच्या एकूण १० शाळा आहेत. त्यापैकी सात मराठी माध्यम, दोन उर्दू आणि एका गुजराती माध्यमाच्या शाळेचा समावेश आहे. या सर्व शाळांमध्ये आतापर्यंत सातवीपर्यंतचे शिक्षण विद्यार्थ्यांना मिळत होते. पुढील वर्गाची सोय नसल्याने साहजिकच दरवर्षी सातवी उत्तीर्ण होऊन जवळपास २५० ते ३०० विद्यार्थी या शाळांमधून बाहेर पडत होते. त्यातील काहींची आर्थिक परिस्थिती चांगली असल्यास खासगी शाळेत प्रवेश घ्यायचे; तर काही जण शुल्क भरणे शक्य नसल्याने शिक्षण प्रवाहातून बाहेर पडायचे. मोफत आणि दर्जेदार शिक्षण महापालिकेच्या शाळेत मिळत असल्याने मोलमजुरी करणाऱ्यांची मुले या शाळांमध्ये शिक्षण घेऊन गुणवत्ता धारण करतात; परंतु पुढील शिक्षणाचा खर्च करणे शक्य नसल्याने महापालिकेच्या शाळांमध्येच तशी सोय करावी, अशी मागणी पालकांकडून सातत्याने होत होती. त्यानुसार शिक्षणाधिकारी रमेश चव्हाण यांनी तसा ठराव मांडला. त्याला आयुक्त मंगेश चितळे यांनी संमती दिल्याने यावर्षीपासून आठ शाळांमध्ये आठवीचा वर्ग सुरू झाला आहे. त्यात सात मराठी माध्यमाच्या; तर एका उर्दू माध्यमाच्या शाळेचा समावेश आहे.
--------------
या शाळांमध्ये आठवीचा वर्ग
पनवेल महापालिकेच्या मराठी माध्यमाच्या शाळा क्रमांक १, २, ४, ५, ६, ७, ८ आणि उर्दू शाळा क्रमांक १० अशा एकूण आठ शाळांमध्ये चालू शैक्षणिक वर्षापासून आठवीचा वर्ग सुरू झाल्याने आजूबाजूच्या परिसरातील २५० ते ३०० विद्यार्थ्यांची पुढील शिक्षणाची सोय झाली आहे.
----------
सातवीनंतर खासगी शाळेत शुल्क भरून शिक्षण घेण्याइतकी आर्थिक परिस्थिती नसल्याने महापालिकेच्या शाळेतच आठवीचा वर्ग सुरू करावा, अशी मागणी खूप होती. त्याला आयुक्तांनीही पाठबळ दिल्याने आठवीचा वर्ग सुरू केला आहे. गोरगरीब विद्यार्थ्यांना दर्जेदार शिक्षण देण्यासाठी आम्ही कटिबद्ध आहोत.
- रमेश चव्हाण, शिक्षणाधिकारी, पनवेल महापालिका