होम प्लॅटफॉर्मवर चरसी, गर्दुल्यांचा वावर

अंबरनाथ, ता. २३ (वार्ताहर) : अंबरनाथच्या पश्चिमेला रेल्वेस्थानकाला लागूनच स्वामीनगर ही सर्वांत मोठी झोपडी आहे. या झोपडीपट्टीत चरस आणि गांजाची सर्रास विक्री होत असल्याने तरुण पिढी नशेच्या आहारी गेली आहे. काही दिवसांपूर्वीच गुन्हे शाखेने या परिसरातून दोन वेळा छापा टाकून आरोपींसह लाखोंचा चरस गांजा पकडला होता. अंबरनाथ रेल्वेस्थानकाचा होम प्लॅटफॉर्म जवळच असल्याने चरसी आणि गांजाडी फिरत असतात. यामुळे प्रवाशांसह महिलांमध्ये भीतीचे वातावरण पसरले आहे.
काही दिवसांपासून अंबरनाथ शहरात, तसेच ग्रामीण भागात सर्रासपणे चरस, गांजाची विक्री होत आहे. लहान मूल आणि तरुण पिढी नशेच्या आहारी गेले. यामुळे शहरात गुन्हेगारी आणि चोरीच्या घटनेतही वाढ झाली आहे. अंबरनाथमध्ये चरस, गांजा त्याचबरोबर मोफिनसारखे अमली पदार्थ अगदी गलोगल्ली, रस्त्यावर, टपऱ्यावर स्वस्त दरात मिळत आहेत. रेल्वे स्थानकाला लागून स्वामीनगर, भगतसिंग नगर, भेंडीपाडा, देवी दुर्गाचापाडा, विमको नाका, शिवमंदिर येथील झोपडपट्टी परिसरात अमली पदार्थांची विक्री मोठ्या प्रमाणात होत आहेत. हे चरसी रहिवासी भागात आणि स्टेशन परिसरात फिरत असतात. त्यामुळे नागरिकांमध्ये भीतीचे वातावरण पसरले आहे. स्वामीनगरच्या या मैदानातून स्थानकावर येण्यासाठी मार्ग आहे. या मार्गावरूनच हे चरसी महिला प्रवासी उभे असतात, तिथे फेऱ्या मारत असतात. यामुळे महिलांमध्ये भीतीचे वातावरण असून, त्यांच्या सुरक्षिततेचा प्रश्न ऐरणीवर आला आहे. दरम्यान, या ठिकाणी सुरक्षारक्षकांची नेमणूक करावी, अशी मागणी जोर धरत आहे.