प्रभाग रचनेत अनुसूचित जातीच्या प्रभागांची संख्या वाढवा

प्रभाग रचनेत अनुसूचित जातीच्या प्रभागांची संख्या वाढवा
भाजपचे महापालिका आयुक्तांना पत्र
कल्याण, ता. २१ (वार्ताहर) : आगामी कल्याण-डोंबिवली महापालिका निवडणुकीत अनुसूचित जातीच्या प्रभागाची रचना २०२५च्या लोकसंख्येच्या आधारे ग्राह्य धरून प्रभागांची संख्या वाढवावी, अशी मागणी भारतीय जनता पक्ष अनुसूचित मोर्चा कल्याण जिल्हा सरचिटणीस राम बनसोडे यांनी महापालिका आयुक्तांकडे पत्राद्वारे केली आहे.

कल्याण-डोंबिवली महापालिकेच्या निवडणुकीसाठी प्रभाग रचना करण्याचे काम सुरू आहे. ११ नाव्हेंबर २०२० मध्ये पालिकेची मुदत संपली, त्यानंतर प्रशासक राजवट सुरू झाली. त्यानंतर २७ गावांचा तिढा कायम असल्याने न्यायालयाच्या आदेशाने महाराष्ट्र सरकारच्या निर्देशाने पहिल्यांदाच पॅनलनुसार प्रभागरचना करण्याचे काम सुरू आहे. महापालिकेची २०११च्या जनगणनेनुसार १८ लाख लोकसंख्या गृहीत धरून २०१५च्या २७ गावांसह निवडणुका घेण्यात आल्या होत्या. यामध्ये एकूण १२२ प्रभाग होते. त्यामध्ये अनुसूचित जाती प्रभागांची एकूण संख्या १३ होती, ती लोकसंख्येच्या व प्रभाग रचनेच्या तुलनेत कमी होती. पालिका निवडणुका १९९५ पासून कायमच एक प्रभाग निवडणूक झाल्याने लोकप्रतिनिधी व मतदारांना पॅनल पद्धतीने निवडणुकीला सामोरे जाण्याचा अनुभव नाही. त्यामुळे महापालिका प्रशासनामार्फत सुरू असलेल्या पॅनल पद्धतीच्या निवडणूक प्रभाग रचनेत अनुसूचित जातीच्या लोकसंख्येच्या आधारे प्रभाग संख्या वाढवावी, अनुसूचित जातीवर होणारा अन्याय दूर करावा, अशी मागणी राम बनसोडे यांनी आयुक्तांकडे केली आहे.