सामन्य मालमत्ताकरावर १० टक्के सवलत

सामान्य मालमत्ता करावर १० टक्के सवलत
३० जूनपर्यंत लाभ घेण्याचे पालिकेचे आवाहन
वाशी, ता. २४ (बातमीदार) ः नवी मुंबई महापालिकेच्या मालमत्ता कर विभागाने पहिल्या तिमाहीमध्ये सामान्य करावर १० टक्क्यांची सवलत जाहीर केली आहे. विशेष म्‍हणजे, हा लाभ ३० जूनपर्यंत देण्यात आला आहे. त्‍यामुळे मालमत्ताधारकांनी याचा लाभ घ्यावा, असे आवाहन करण्यात आले आहे.
मालमत्ताधारकांना वेळेमध्ये कराचा भरणा करता यावा, यादृष्टीने संबंधित विभागाने ऑनलाइन सुविधा सुरू केली आहे. यामध्ये मालमत्ताधारक महापालिकेच्या वेबसाईटवरून तसेच ऑनलाइन विविध यूपीआय सुविधांद्वारे आपला मालमत्ता कर घरबसल्या अगदी सहजपणे भरू शकणार आहे. त्यासोबतच ज्या नागरिकांना कॅश काउंटर्समध्ये जाऊन कराचा भरणा करावयाचा आहे, अशा मालमत्ताधारकांसाठी साप्ताहिक सुट्टीच्या दिवशीदेखील करभरणा खिडकी सुरू ठेवण्याचा निर्णय महापालिकेचे आयुक्त तथा प्रशासक डॉ. कैलास शिंदे यांनी घेतला आहे. त्यानुसार शनिवार व रविवारी सकाळी १० ते दुपारी तीन या वेळेत मालमत्ता करभरणा खिडकी सुरू राहणार आहे. नागरिकांना मालमत्ता कर भरण्यामध्ये वेळेची अडचण येऊ नये व सवलतीचा लाभ घेता यावा, यासाठी ही सोय उपलब्ध करून देण्यात आलेली आहे. यासोबतच नागरिकांना ऑनलाइन करभरणा करून सामान्य करावर जाहीर करण्यात आलेल्या १० टक्के सवलतीचा लाभ ३० जूनपर्यंत घेता येणार आहे, याची नोंद घेण्याचे आवाहन नवी मुंबई महापालिकेच्या वतीने करण्यात आले आहे.