बेशिस्त रिक्षाचालकांवर कारवाई होणारच

कल्याण-डोंबिवलीत नियमबाह्य रिक्षा वाहतूक
कारवाईविरोधात रिक्षा संघटनांचे पोलिसांना निवेदन

डोंबिवली, ता. २३ : ठाण्याच्या धर्तीवर कल्याण-डोंबिवली शहरात नियमबाह्य पद्धतीने चार ते पाच प्रवासी घेऊन प्रवासी वाहतूक करणाऱ्या बेशिस्त रिक्षाचालकांवर वाहतूक विभागांनी दंडात्मक कारवाई सुरू केली आहे. त्यामुळे रिक्षाचालकांचे धाबे दणाणले आहेत, तर शनिवारी (ता. २१) काही रिक्षाचालकांनी या कारवाईला विरोध करत वाहतूक अडविण्याचा प्रयत्न केला. तसेच पोलिसांना निवेदन दिले; मात्र नियम मोडणाऱ्यांविरोधात कारवाई सुरूच राहणार असल्याचे पोलिसांनी सांगितले.

रिक्षाचालकांनी वाहतूक नियमाप्रमाणे तीन प्रवासी घेऊन प्रवास करणे आवश्यक आहे; मात्र कल्याण-डोंबिवली शहरात रिक्षाचालक चार ते पाच प्रवासी रिक्षात बसवून प्रवासीभाडे आकारत आहेत. चालकाशेजारील आसनावर प्रवासी वाहतूक करतात. त्यामुळे वाहतूक पोलिसांनी अशा रिक्षाचालकांविरुद्ध दंडात्मक कारवाईची मोहीम उघडली आहे. या कारवाईमुळे आपल्या व्यवसायावर परिणाम होतो, असा कांगावा करत डोंबिवली पूर्वेतील काही मोजक्या रिक्षाचालकांनी शनिवारी सायंकाळी बाजी प्रभू चौकात रिक्षा आडव्या लावून वाहतुकीत खोळंबा आणण्याचा प्रयत्न केला; मात्र वाहतूक पोलिसांनी तत्काळ त्यांना बाजूला करत वाहतूक सुरळीत केली; मात्र यामुळे प्रवाशांची गैरसोय झाली.

कल्याण-डोंबिवली शहरातील रिक्षा संघटनांना राजकीय पक्षांचे पाठबळ असल्याने रिक्षाचालक कारवाईला जुमानत नाहीत. नियमबाह्य पद्धतीने सर्रास प्रवासी वाहतूक केली जाते. जवळचे भाडे नाकारणे, प्रवाशांशी उद्धट वर्तन करणे, अव्वाच्या सव्वा भाडे आकाराने आदी प्रकार रिक्षाचालकांकडून सुरूच असतात; मात्र या कारवाईमुळे व्यवसायावर परिणाम होत असून ही कारवाई शिथिल करावी, असे निवेदन रिक्षासंघटनांनी पोलिसांना दिले आहेत, मात्र पोलिसांनी कारवाईचा बडगा उगारत ही कारवाई सुरूच ठेवली आहे. मानपाडा पोलिस ठाण्यात शनिवारी पाच रिक्षाचालकांवर दंडात्मक कारवाई केल्याची माहिती मानपाडा पोलिसांनी दिली.