हावरे गृहनिर्माण सोसायटीत वीजबचतीचा मंत्र

खारघर, ता. २२ (बातमीदार) : विजेची वाढती मागणी व वीजबिलावर मोठ्या प्रमाणात होणाऱ्या खर्चामुळे खारघरमधील हावरे स्प्लेंडर सोसायटीने पर्यावरणपूरक निर्णय घेतला आहे. या सोसायटीने जवळपास सव्वा कोटी रुपये खर्च करून सौरऊर्जा प्रकल्प उभारला आहे. या प्रकल्पाचे उद्‍घाटन नुकतेच आमदार प्रशांत ठाकूर यांच्या हस्ते करण्यात आले.
खारघर सेक्टर २०मध्ये असलेल्या हावरे स्प्लेंडर सोसायटीत ३४९ फ्लॅट व क्लब हाउस आहे. त्यामुळे वीजबिलापोटी प्रत्येक महिन्याला तीन लाखांहून अधिक रुपये भरणा करावे लागत आहे. दरम्यान, विजेची वाढती मागणी, महावितरणकडून केले जाणारे भारनियमन, तसेच पावसाळ्यात विजेच्या लपंडावापासून मुक्ती मिळविण्यासाठी आणि सोसायटीच्या वीजबिलाच्या कटकटीतून सुटका करून घेण्यासाठी सोसायटीने सव्वा कोटी रुपये खर्च करून दीडशे वॉटचे सोलर पॅनेल उभारले असून सौरऊर्जेमुळे सोसायटीची आर्थिक बचत होणार आहे. दरम्यान, आमदार प्रशांत ठाकूर यांनी या उपक्रमाचे कौतुक करून नागरिकांनी सौरऊर्जेचा वापर करावा, असे सांगितले.
या वेळी भाजपचे जिल्हा सचिव ब्रिजेश पटेल, पदाधिकारी किरण पाटील, अमर उपाध्याय, दिलीप जाधव, प्रवीण बेरा, शैलेंद्र त्रिपाठी, हावरे स्प्लेंडर सोसायटीचे पदाधिकारी शिवम सिंग, विश्वंभर सिंह, संजय जाधव यांच्यासह सोसायटीचे रहिवासी मोठ्या प्रमाणात उपस्थित होते.
-------------
हावरे सोसायटीत ३४९ फ्लॅट असून पाणी, तसेच सोसायटीमधील पथदिवे, क्लब हाउस आदी वापरामुळे महिन्याला वीजबिलावर तीन लाखांहून अधिक रुपये खर्च करावे लागत आहेत. आता सौरऊर्जेमुळे मासिक अडीच लाखांहून अधिक रुपये बचत होणार आहेत.
- शिवम सिंग, अध्यक्ष, हावरे स्प्लेंडर सोसायटी