सेक्स रॅकेटप्रकरणी तरुणीला अटक

सेक्स रॅकेटप्रकरणी तरुणीला अटक
बांगुरनगर पोलिसांची कारवाई
अंधेरी, ता. २३ (बातमीदार) ः उत्तर उपनगरातील एका सेक्स रॅकेटचा पर्दाफाश करून एका २५ वर्षांच्या तरुणीला बांगुरनगर पोलिसांनी दोन दिवसांपूर्वी अटक केली. या कारवाईत पोलिसांनी तीन तरुणींची सुटका केली असून, तिघींना पोईसर येथील महिला सुधारगृहात पाठविण्यात आले आहे.
अटकेतील तरुणीला स्थानिक न्यायालयाने पोलिस कोठडी सुनावली आहे. तपासात ही तरुणी ऑनलाइन सेक्स रॅकेट चालवत असल्याचे उघडकीस आले आहे. बोरिवलीत राहणारी ही तरुणी ग्राहकांच्या मागणीनुसार काही तरुणींना विविध हॉटेल आणि गेस्टहाउसमध्ये पाठवत असल्याची माहिती पोलिसांना मिळाली होती. शहानिशा करण्यासाठी पोलिसांनी एका बोगस ग्राहकाच्या मदतीने तिला संपर्क साधला होता. तीन तरुणींची मागणी करण्यात आली होती. ठरल्याप्रमाणे तीन तरुणींसोबत मालाडच्या चिंचोली परिसरात ती आली होती. तिचे बोगस ग्राहकासोबत आर्थिक व्यवहार सुरू असताना तिथे बांगुरनगर पोलिसांच्या एका विशेष पथकाने कारवाई केली होती. या वेळी २५ वर्षांच्या या तरुणीला पोलिसांनी ताब्यात घेतले. तिच्या तावडीतून तीन तरुणींची सुटका केली. वैद्यकीय तपासणीनंतर या तिन्ही तरुणींना नंतर महिला सुधारगृहात पाठविण्यात आले होते.