घाटकोपरमधील चाळीतील रुमला आग

घाटकोपरमधील चाळीतील रूमला आग
देवदर्शनाला आईसोबत गेल्याने मुलगी बचावली
घाटकोपर, ता. २३ (बातमीदार) ः पश्चिमेतील दुर्गादेवी मंडळातील एका चाळीत बैठ्या घराच्या वरील मजल्यावर सोमवारी (ता. २३) सकाळच्या सुमारास शॉर्ट सर्किटमुळे आग लागली. आजारी असल्याने दोन ते तीन दिवस शाळेत न जाता दुपारी उशिरापर्यंत झोपून असणारी नऊ वर्षांची मुलगी आज नेमकी आईसोबत देवळात गेल्याने बचावली.
आगीत घराचे नुकसान झाले असले तरी आपली मुलगी बचावल्याने कुटुंबावरील मोठे संकट टळल्‍याचे तिच्या आई-वडिलांनी सांगितले. गोळीबार रोड, दुर्गादेवी मंडळ येथील एका चाळीत एकमजली घराच्या वरच्या मजल्यावर एकनाथ बाबासाहेब राजपुरे त्यांची पत्नी आणि नऊ वर्षांची मुलगीसोबत राहतात. खालच्या खोलीत त्या लहान मुलीचे आजी, आजोबा राहतात. वरच्या मजल्यावर राहणाऱ्या दाम्‍पत्याची नऊ वर्षांची मुलगी चौथीमध्ये शिकत असून, गेल्या दोन तेे तीन दिवसांपासून आजारी आहे. ती मुलगी दुपारी १२ ते १ वाजेपर्यंत घरात झोपून असते. तिचे वडील कामासाठी बाहेर जातात, मात्र आज ती घरात न झोपता आईसोबत नजीकच्या शंकराच्या देवळात दर्शनाला गेली होती. नेमके सकाळी १० वाजताच्या सुमारास घराच्या खिडकीजवळील भागात शॉर्ट सर्किट झाल्याने आग लागली.
ही आग घरातील इतर इलेक्ट्रिक वायरच्या संपर्कात आल्‍याने आग अधिकच भडकली. घरातील टिव्ही, वॉशिंग मशीन, कपडे, प्लॅस्टिक डब्यात ठेवलेले पैसे आदी सामान जळाले. घरात त्या वेळी कोणी नव्हते, मात्र खालील घरात लहान मुलीचे आजोबा अंघोळ करीत होते. शेजारच्या घरातील एका मुलीने त्यांच्या घराच्या खिडकीतून आगीवर पाणी टाकून आग विझविण्याचा प्रयत्न केला. तेवढ्यात आजूबाजूचे इतर लोकही मदतीला धावले. त्यांनी सतत पाणी मारून आग विझविली. त्यानंतर अग्निशमन दलाचे जवान आणि अदानी कंपनीचे अधिकारी, कर्मचारी घटनास्थळी दाखल झाले.