२१ वर्षीय आयुषला नाशिक कारागृहात स्थानबद्ध

२१ वर्षीय आरोपी कारागृहात स्थानबद्ध
पोलिसांची ‘एमपीडीए’अंतर्गत कडक कारवाई
उल्हासनगर, ता. २३ (वार्ताहर) : शहरातील रस्त्यांवर दहशत माजवणाऱ्या आणि समाजासाठी धोका ठरलेल्या एका २१ वर्षीय गुन्हेगारावर पोलिसांनी थेट ‘एमपीडीए’अंतर्गत कारवाई करत त्याला तुरुंगात पाठवले आहे. तरुण वयात विविध गंभीर गुन्ह्यांमध्ये गुंतलेल्या आयुष संजय रॉय या गुन्हेगारावर कारवाई करत पोलिसांनी इतरांना इशारा दिला आहे.
विठ्ठलवाडी पोलिस ठाण्याच्या हद्दीतील आयुष संजय रॉय (वय २१, रा. कृष्णानगर, दुलारी पाडा) याच्यावर अनेक गंभीर स्वरूपाचे गुन्हे दाखल आहेत. त्याच्यामुळे स्थानिकांमध्ये दहशतीचे वातावरण निर्माण झाले होते. त्यामुळे त्याच्यावर महाराष्ट्र प्रतिबंधक गुन्हेगारी अधिनियमातंर्गत कठोर कारवाई करण्याचा निर्णय घेण्यात आला. विठ्ठलवाडी पोलिसांनी संकलित केलेल्या पुराव्यांच्या आधारे त्याच्याविरुद्ध ठाणे पोलिस आयुक्त आशुतोष डुंबरे यांच्याकडे एमपीडीएअंतर्गत प्रस्ताव पाठवण्यात आला होता. त्यानुसार आरोपी आयुष रॉय यास नाशिक रोडच्या मध्यवर्ती कारागृहात स्थानबद्ध करण्याचे आदेश देण्यात आले आहे.
याची तातडीने अंमलबजावणी करत पोलिस उपायुक्त सचिन गोरे, साहाय्यक पोलिस आयुक्त अमोल कोळी व वरिष्ठ पोलिस निरीक्षक अनिल पडवळ यांच्या नेतृत्वाखाली विठ्ठलवाडी पोलिसांच्या विशेष पथकाने आरोपीला ताब्यात घेतले आणि त्याला नाशिक रोड कारागृहात स्थानबद्ध करण्यात आले. समाजात शांतता व कायदा-सुव्यवस्था अबाधित ठेवण्यासाठी अशा सराईत गुन्हेगारांवर एमपीडीएसारख्या कायद्यांचा प्रभावी वापर हीच एकमेव दिशा असल्याचे या कारवाईतून अधोरेखित झाले आहे.