साचलेल्या पाण्यातून विद्यार्थ्याची कसरत

साचलेल्या पाण्यातून विद्यार्थ्यांची कसरत
नालासोपारा, ता. २४ ( बातमीदार) : वसई-विरार नालासोपारामध्ये सोमवारी (ता. २३) रात्रभर जोरदार पावसाने हजेरी लावली होती. या पावसामुळे नालासोपारा पूर्व गाला नगर, शिर्डी नगर, आचोळा रोड पाण्याखाली गेला होता. गाला नगर सर्कलजवळ मंगळवारी ( ता. २४) सकाळी ८ वाजेपर्यंत पाणी ओसरले नव्हते. त्यामुळे शाळकरी मुलांना याच पाण्यातून वाट काढत शाळेत जावे लागले. साचलेले पाणी तसेच रस्त्यात मोठमोठे खड्डे पडल्याने रिक्षा, दुचाकी अपघाताचे प्रमाणही वाढले आहे. सकल भागातील पाण्याचा निचरा होण्यासाठी पालिका प्रशासनाने प्रयत्न करावेत, तसेच रस्त्यातील खड्डे बुजवावेत, अशी मागणी नागरिक, पालकांकडून होत आहे.

थोडा जरी पाऊस झाला, तर नालासोपारा पूर्व सेन्ट्रल पार्क, ओसवाल नगरी, तुळिंज पोलिस ठाणे, स्थानक परिसरात मोठ्या प्रमाणात पाणी साचते. वसई विरार महापालिकेकडून जलवाहिनी टाकण्याची कामे अनेक ठिकाणी अपूर्णावस्थेत आहेत. या कामांसाठी रस्ते खोदून ठेवले आहेत. त्यामुळे थोडासा जरी पाऊस झाला, तर नालासोपारा पूर्व, गाला नगर, शिर्डी नगर, डॉन लेन, आचोळा रस्ता पाण्याखाली जात आहे. मंगळवारी सकाळी गाला नगर सर्कल येथे फूट ते दोन फूट पाणी साचले होते. त्यामुळे शाळकरी मुलांना याच दुर्गंधीयुक्त पाण्यातून मार्ग काढत शाळेत जावे लागले, तर त्याच ठिकाणी एक मोठा खड्डा पडल्याने अपघाताचे प्रमाणही वाढले आहे.