संरक्षक भिंत कोसळून वाहनांचे नुकसान

संरक्षक भिंत कोसळून वाहनांचे नुकसान
कल्याण, ता. २४ (बातमीदार) : पूर्वेतील काटेमानिवली परिसरात इमारतीची संरक्षक भिंत कोसळून असंख्य वाहनांचे नुकसान झाल्याची दुर्घटना सोमवारी (ता. २३) मध्यरात्रीच्या सुमारास घडली. शेजारील निर्माणधीन असलेल्या इमारतीच्या बांधकाम साहित्याच्या दबावामुळे इमारतीची संरक्षक भिंत कोसळून नुकसान झाल्याचा आरोप रहिवाशांनी केला आहे. यासंदर्भात संबंधित बांधकाम व्यावसायिकाविरोधात कोळसेवाडी पोलिस ठाण्यात तक्रार दाखल केल्याचेही समजते.
कल्याण पूर्वेच्या काटेमानिवली परिसरात योगेश्वर टॉवर नावाची सोसायटी आहे. या सोसायटीला लागूनच गेल्या काही महिन्यांपासून नव्या इमारतीचे बांधकाम केले जात आहे. त्यामुळे याठिकाणी सतत रेती, खडी आदी बांधकाम साहित्य मोठ्या प्रमाणात उतरवले जात आहे; मात्र बांधकाम व्यावसायिकाकडून अद्याप याठिकाणी कोणतीही भिंत बांधण्यात आली नसल्याने हे बांधकाम साहित्य शेजारील योगेश्वर टॉवरच्या संरक्षक भिंतीला लागून टाकले जात असल्याची माहिती सोसायटीकडून देण्यात आली. तसेच या बांधकाम साहित्यामुळे संरक्षक भिंतीवर मोठा दबाव येऊन भिंतीला धोका निर्माण होत एखादी दुर्घटना घडू शकते, अशी भीती सोसायटीने व्यक्त करीत त्यासंदर्भात संबंधित बांधकाम व्यावसायिकाकडे पत्रव्यवहारही केला होता; मात्र त्याकडे दुर्लक्ष झाल्याचे आजच्या या घटनेवरून सिद्ध होत असल्याचे सोसायटीकडून सांगण्यात आले.