वन जमिनींमुळे आयुष्य खडतर

किन्हवली, ता. २४ (बातमीदार)ः रस्ता नसल्याने चाफेवाडीतील एका गर्भवती महिलेला प्रसूतीसाठी कापडाच्या डोलीतून दवाखान्यापर्यंत घेऊन जाण्याची वेळ आली. या घटनेमुळे मालकी तसेच वनजमिनीमुळे रस्ते नसलेल्या शहापूर तालुक्यातील ६४ गावपाड्यांमधील आदिवासींना सामना कराव्या लागणाऱ्या विविध अडचणी समोर आल्या आहेत.
शहापूर तालुक्यातील सोगाव जिल्हा परिषद गटातील नडगाव-सो ग्रामपंचायत हद्दीतील चाफ्याचीवाडीला रस्ता मिळत नसल्याने दगडधोंडे, खाचखळगे, चिखल तुडवत प्रवास करावा लागतो. पावसाळ्यात दुथडी भरून वरून वाहणाऱ्या नाल्यावर साकव नसल्याने वाहने एक किलोमीटर दूरवर ठेवावी लागतात. अशातच रस्त्याअभावी संगीता मुकणे या गर्भवती महिलेला प्रसूतीसाठी कापडाची डोली करून दवाखान्यापर्यंत नेण्यात आले. उपचाराला उशीर झाला म्हणून तिची प्रकृती गंभीर झाल्याने ठाणे येथील सामान्य रुग्णालयात उपचारासाठी भरती करण्यात आले आहे. विंचू तसेच सर्पदंशाच्या वेळीदेखील अशी परिस्थिती अनेकदा होत असते.
--------------------------------------
स्थानिकांची अरेरावी
चाफ्याच्या वाडीचा रस्ता तयार व्हावा, यासाठी ग्रामपंचायतीने वन जमीन मिळविण्यासाठी वनहक्क कायदा, २००६च्या कलम ३(२)मधील तरतुदीनुसार प्रस्ताव सादर केला आहे. समितीच्या गटविकास अधिकारी यांनीही वनविभागाकडे शिफारस केली आहे; पण हा रस्ता काही स्थानिकांच्या जागेतून जात असल्याने अनेकवेळा प्रयत्न करूनही प्रलंबित असल्याचे सरपंच जयवंत वाघ यांनी सांगितले.