पालघर-वाडा राज्यमार्गावर धोका

मोखाडा, ता. २६ (बातमीदार)ः पालघर- वाडा- देवगाव राज्यमार्गावर खोडाळ्यापुढे रस्ता खचला आहे. त्यामुळे मुंबई-आग्रा राष्ट्रीय महामार्गाला जोडणाऱ्या मार्गावरील वाहतूक विस्कळित होण्याची शक्यता आहे.
मोखाडा तालुक्यातून पालघर- वाडा- देवगाव हा राज्यमार्ग खोडाळा गावापासून दोन किलोमीटरच्या अंतरावर पावसामुळे खचला आहे. नाशिकजवळच्या त्रंबकेश्वर तीर्थक्षेत्रासह मुंबई-आग्रा राष्ट्रीय महामार्गाला जोडणारा मार्ग असल्याने वारकरी, शालेय, महाविद्यालयीन विद्यार्थी तसेच प्रवाशांची नियमित वाहतूक असते. तसेच मुंबई-आग्रा राष्ट्रीय महामार्गावर वाहतूक कोंडी असल्यास पालघर, वाडा तसेच मुंबई आणि नाशिककडे जाण्यासाठी या मार्गाचा सर्रास वापर केला जात असल्याने अपघाताला निमित्त ठरण्याची शक्यता आहे.
------------------------
प्रशासनाचे दुर्लक्ष
तालुक्यात पावसाचा जोर कायम आहे. त्यामुळे रस्ता अधिकच खचण्याची भीती आहे; पण असे असतानाही बांधकाम विभागाकडून फलक अथवा कोणतीही सूचना दिली गेली नसल्याने अपघाताची भीती अधिक बळावली आहे.