शिरगाव रस्त्यावरील सिग्नल होर्डिंगच्या आड

बदलापूर, ता. २६ (बातमीदार) : बदलापूर शहरात वाहतूक कोंडीची समस्या सोडविण्यासाठी चौक परिसर आणि मुख्य रस्त्यांवर पालिकेने सिग्नल यंत्रणा बसवण्यास सुरुवात केली आहे. अंबरनाथ-बदलापूर मुख्य रस्त्यावरील शिरगाव परिसरातील डॉ. बाबासाहेब आंबेडकर चौक प्रवेशद्वाराबाहेरही सिग्नल यंत्रणा बसवली आहे. हे सिग्नल पालिकेच्या होर्डिंगच्या कमानी मागे लपले जात आहे.
बदलापूर पालिकेने शहरातील वाहतूक कोंडीवर उपाय शोधून काढला आहे. वाहनांची वर्दळ जास्त असलेल्या ठिकाणी, चौक परिसर आणि राज्य महामार्गाला जोडणारे मुख्य रस्ते येथे पालिकेच्या माध्यमातून सिग्नल यंत्रणा उभारण्यात आली आहे. मात्र, काही सिग्नल यंत्रणा ही नियोजनअभावी उभारण्यात आल्याचे चित्र शहरात दिसून येत आहे. यातील मुख्य उदाहरण म्हणजे, अंबरनाथ-बदलापूर मुख्य रस्त्यावर डॉ. बाबासाहेब आंबेडकर चौक प्रवेशद्वार कात्रप ते शिरगाव परिसरातील मध्य भागात बसवण्यात आलेली सिग्नल यंत्रणा आहे. ही सिग्नल यंत्रणा पालिकेने बसवलेल्या होर्डिंगच्या आड लपली जात आहे. त्यामुळे वाहनचालकांनी सिग्नल बघायचे कसे? हा प्रश्न वाहनचालक उपस्थित करत आहेत.