शिवबंधन अभियानात ज्येष्ठांचा विसर

किन्हवली, ता. २६ (बातमीदार)ः ठाणे जिल्ह्यात ठाकरे गटाचे भगवा शिवबंधन अभियान सुरू आहे. याअंतर्गत ज्येष्ठ शिवसैनिक तसेच शाखाप्रमुखांशी संवाद साधण्यात येत आहे; पण या दौऱ्यात ज्येष्ठ शिवसैनिकांना डावलण्यात आल्याने नाराजीचा सूर आहे.
ठाकरेच्या शिवसेनेचे ठाणे जिल्हाप्रमुख कुंदन पाटील शिवबंधन अभियानानिमित्त सध्या शहापूर तालुक्याच्या दौऱ्यावर आहेत. या अभियानाअंतर्गत किन्हवली, सोगाव व मळेगाव गटाचा दौरा केला; पण किन्हवलीतील जुन्या निष्ठावंत शिवसैनिकांचा मात्र त्यांना विसर पडला. त्यात तत्कालीन जिल्हाप्रमुख दिवंगत धर्मवीर आनंद दिघे, तसेच माजी मंत्री दिवंगत साबीरभाई शेख यांच्या मार्गदर्शनात गावोगावी शिवसेना पोहोचविणाऱ्या गावातील चंद्रकांत म्हात्रे, शामकांत पष्टे, अशोक बडेराव, सुरेश पाचंगे यांच्या संवाद साधण्याची तसदी घेतली नाही. तर माजी उपतालुकाप्रमुख रवींद्र शिंदे व्यायामासाठी सोगाव रस्त्यावर दिसल्याने कार्यकर्त्यांनी औपचारिकता म्हणून जिल्हाप्रमुखांची भेट घालून दिली. त्यामुळे काही निष्ठावंत शिवसैनिकांनी या दौऱ्यापासून दूर राहणेच पसंत केले.
----------------------------------------
शिवसेनेच्या भगवा शिवबंधन दौऱ्याची कोणतीही कल्पना नव्हती. ज्येष्ठ शिवसैनिक म्हणून आम्हाला भेटण्यासाठी नेतेमंडळींना जरी वेळ नसला तरी आमची निष्ठा कायम दिवंगत बाळासाहेब व पक्षप्रमुख उद्धव ठाकरे यांच्यासोबतच आहे.
- अशोक बडेराव, ज्येष्ठ शिवसैनिक, किन्हवली