काळू धबधब्याची पर्यटकांना मोहिनी

मुरबाड ता. २६ (वार्ताहर) ः निसर्गरम्य माळशेज घाटाच्या पायथ्याशी वसलेला तसेच ‘द गॉड्स व्हॅली’ म्हणून प्रसिद्ध असलेला काळू धबधबा परिसर हिरवाईने नटलेला आहे. त्यामुळे पावसाळी भटकंती करणाऱ्यांसाठी हा धबधबा आकर्षणाचे केंद्र बनला आहे.
माळशेज घाटात काळू धबधबा पर्यटकांसाठी आकर्षण बनला आहे. त्यामुळे येथे पर्यटक पर्यवरणाचा आस्वाद घेण्यासाठी येत आहेत. धबधब्याच्या मार्गातील चढ-उतार आणि तेथे पोहोचल्यावर मिळणारा आनंद पर्यटकांना पर्वणी ठरत आहे. तीन टप्प्यात कोसळणारा हा धबधबा पावसाळ्यात ट्रेकिंगसाठी येणाऱ्यांचे आवडते ठिकाण आहे, पण या धबधब्याच्या तळाशी पोहोचण्यासाठीचा मार्ग आव्हानात्मक असल्याने काळजी घेण्याचे आवाहन स्थानिकांकडून केले जात आहे.
-------------------------------------
प्रवास जिकिरीचा
थितबी गावातून या धबधब्याकडे जाण्याचा प्रवास सुरू होता, परंतु पावसाच्या स्थितीवर लक्ष ठेवण्याची गरज येथील स्थानिक व्यक्त करतात, कारण मुसळधार पावसात नदी पार करणे धोकादायक आहे. तसेच स्थानिक लोक दोरीच्या सहाय्याने नदी पार करण्यासाठी मदत करतात. त्यामुळे जुलैऐवजी ऑगस्ट, सप्टेंबर किंवा ऑक्टोबरमध्ये काळू धबधब्याला भेट देण्याचा सल्ला स्थानिक देतात.