खारघरमध्ये विजेचा खेळखंडोबा सुरूच

खारघर, ता. २६ (बातमीदार) : भूमिगत वीजवाहिन्या जळाल्यामुळे खारघर परिसरातील २५ हजार कुटुंबांना मंगळवारची रात्र अंधारात काढावी लागली. त्यानंतर पुन्हा बुधवारी रात्री २ वाजेपर्यंत वीज गायब असल्यामुळे रहिवाशांमध्ये संतापाचे वातावरण पसरले आहे.
खारघर सेक्टर-१२ मधून सेक्टर-२० ते ३६ परिसरात वीजपुरवठा करणाऱ्या भूमिगत वीजवाहिनीमध्ये बिघाड झाल्यामुळे मंगळवारी दुपारी ३ वाजता वीजपुरवठा खंडित झाल्यामुळे २५ हजार कुटुंबांना मंगळवारची संपूर्ण रात्र जागून काढावी लागली. दरम्यान, बुधवारी सकाळी १२च्या सुमारास वीजपुरवठा सुरळीत होताच रहिवाशांनी सुटकेचा निश्वास सोडला. त्यानंतर बुधवारची रात्र शांततेत जाईल, असे वाटत असताना रात्री ८च्या सुमारास पुन्हा वीजवाहिनीत बिघाड झाला. त्यामुळे संतापलेल्या नागरिकांनी महावितरणच्या अधिकाऱ्यांना फैलावर घेतले. या वेळी संबंधित अधिकाऱ्यांकडून १५ ते २० मिनिटांत वीजपुरवठा पूर्ववत होईल, असे सांगितले जात होते. अखेर रात्री दोन वाजता वीजपुरवठा सुरळीत झाला. गुरुवारीदेखील वीजवाहिन्यांचे काम सुरू असल्याचे महावितरणच्या कर्मचाऱ्यांनी सांगितले. यासंदर्भात उपअभियंता राहुल खुबे यांच्याशी संपर्क केला असता, वीजपुरवठा खंडित होऊ नये यासाठी पूर्वतयारी म्हणून काम सुरू असल्याचे सांगितले.