दुहेरी मालमत्ता कराचा प्रश्न गुंडाळण्याचा प्रयत्न

खारघर, ता. २६ (बातमीदार) : पालिकेचे कर्मचारी सोसायटीत जाऊन सोसायटीच्या पदाधिकाऱ्यांकडून शास्ती माफीसंदर्भात पत्राची मागणी करीत असल्याचा प्रकार कामोठे परिसरातील अनेक सोसायट्यांत उघडकीस आला आहे. पालिका केवळ शास्ती माफ करून दुहेरी मालमत्ता कराचा प्रश्न गुंडाळण्याच्या प्रयत्नात असून, सोसायटीच्या पदाधिकाऱ्यांनी पालिका कर्मचाऱ्यांना शास्ती माफीचे पत्र देऊ नये, असे आवाहन कॉलनी फोरमकडून करण्यात आले आहे.
पनवेल महापालिकेकडून लावण्यात आलेल्या दुहेरी मालमत्ता कराच्या संदर्भात माजी नगरसेविका लीना गरड यांनी उपमुख्यमंत्री एकनाथ शिंदे यांच्याकडे पत्रव्यवहार केला होता. या पत्राची दखल घेऊन नगरविकास खात्याचे प्रधान सचिव गोविंदराज यांनी १९ जूनला मंत्रालयात बैठक आयोजित केली होती. या बैठकीत प्रधान सचिव यांनी आयुक्तांनी शास्ती माफीसंदर्भात आपल्या स्तरावर निर्णय घ्यावी, अशी सूचना केली होती. दरम्यान, पालिकेचे कर्मचारी कामोठेतील सोसायट्यांमध्ये जाऊन पदाधिकाऱ्यांकडून शास्ती माफीचे पत्र घेत असल्याची माहिती लीना गरड यांनी मिळाली. त्यानंतर त्यांनी सोसायटीकडून दिलेल्या पत्राची प्रत आयुक्त आणि मालमत्ता विभागाच्या अधिकाऱ्यांना भेटण्यासाठी गेल्या. आयुक्त उपस्थित नसल्यामुळे त्यांनी मुख्य लेखा अधिकारी गणेश शेट्ये यांना निवेदन दिले. पालिकेचे कर्मचारी सोसायट्यांकडून परस्पर शास्ती माफीसंदर्भात घेत असलेले पत्र हे बेकायदा असून, मालमत्ता करासंदर्भात सुरू असलेले आंदोलन गुंडाळण्याचा प्रयत्न केला जात असल्याचे सांगितले. यासंदर्भात गणेश शेट्ये यांच्याशी संपर्क केला असता, मिळालेले निवेदन मालमत्ता विभागाचे कामकाज पाहणाऱ्या अधिकाऱ्यांकडे पाठविले असल्याचे त्यांनी सांगितले.
------------------
पालिकेने बेकायदा लावलेला मालमत्ता कर माफ करावा, अशी मागणी आहे; मात्र पालिकेचे कर्मचारी कामोठे परिसरातील सोसायट्यांच्या पदाधिकाऱ्यांकडून शास्ती माफीसंदर्भात परस्पर पत्रे घेत आहेत. शास्ती माफ करून मालमत्ता करासंदर्भात सुरू असलेले आंदोलन गुंडाळण्याचा प्रयत्न करीत असल्याचे दिसून येते आहे.
- लीना गरड, माजी नगरसेविका, कॉलनी फोरम