निराधार महिलांच्या मुलींसाठी कन्यादान योजना

निराधार महिलांच्या मुलींसाठी कन्यादान योजना
लग्नासाठी २० हजार रुपयांचे अनुदान
कल्याण, ता. २८ (बातमीदार) : महापालिका क्षेत्रातील निराधार, विधवा, घटस्फोटीत व परितक्त्या महिलांच्या मुलींचे लग्नासाठी पालिका प्रशासन २० हजार रुपयांचे अनुदान देणार आहे. कल्याण-डोंबिवली महापालिका महिला व बालकल्याण विभागाच्या कन्यादान योजनेअंतर्गत अर्ज केलेल्या महिलांना या योजनेचा लाभ घेता येणार आहे. यासाठी पात्र महिलांना काही नियम व अटींसह अर्ज करावा लागणार आहे.

महापालिका क्षेत्रात कमीतकमी तीन वर्षे वास्तव्य असणाऱ्या महिलांसाठीच ही योजना आहे. यासाठी चालू वर्षाचा मालमत्ता कर भरलेली पावती जोडावी लागणार आहे. त्यासोबतच आधार कार्ड, पॅन कार्ड, रेशन कार्ड, वीजबिल, भाड्याने राहत असल्यास करारनामा, विवाह नोंदणी दाखला, महिलेचा पासपोर्ट साइज व मुलीच्या विवाहाचा फोटो, कुटुंबाचा उत्पन्न दाखला (रु. २,४०,००० च्या आतील) तसेच राष्ट्रीयकृत बँकेचे पासबुक आवश्यक आहे. या योजनेचा लाभ मात्र दोन मुलींसाठी असून विवाहाच्या दोन वर्षांच्या आतच हा लाभ मिळवता येणार आहे. अगोदर दोन मुलींसाठी प्रत्येकी एकदा लाभ घेतलेल्यांना तिसऱ्यांदा लाभ घेता येणार नाही.