पोलिसासोबत धक्काबुक्की करून डिझेल चोराचे पलायन

नवी मुंबई, ता. २६ (वार्ताहर) : रस्त्यालगत उभ्या असलेल्या वाहनातून डिझेल चोरणाऱ्या चोरट्याला पकडण्यासाठी गेलेल्या वाहतूक पोलिसाला चोराने धक्काबुक्की केली. त्यानंतर त्यांचा मोबाईल फोन हिसकावून आपल्या साथीदारासह कारमधून पलायन केल्याची घटना बुधवारी (ता. २५) मध्यरात्री जेएनपीए-पनवेल मार्गावर पुष्पकनगर येथे घडली. पनवेल शहर पोलिसांनी या घटनेतील चोराचा व त्याच्या साथीदाराचा शोध सुरू केला आहे.
तक्रारदार पोलिस हवालदार अमिर रसूल मुलाणी (३९) हे पनवेल वाहतूक शाखेत कार्यरत आहेत. बुधवारी रात्री पाऊणच्या सुमारास मुलाणी व त्यांचे सहकारी पोलिस हवालदार युवराज येळे हे दोघेही जेएनपीए-पनवेल मार्गावर पुष्पकनगर येथील रस्त्यावर अनधिकृतपणे उभ्या असलेल्या वाहनांवर कारवाई करीत होते. त्या वेळी एका मिक्सर वाहनातून एक चोरटा डिझेलची चोरी करीत असल्याचे पोलिस हवालदार मुलाणी यांच्या निदर्शनास आले. त्यामुळे त्यांनी चोराला पकडण्याचा प्रयत्न केला असता, त्याने मुलाणी यांना धक्का देऊन खाली पाडले. त्यानंतर चोराने पोलिस हवालदार मुलाणी यांच्या हातातील मोबाईल फोन जबरदस्तीने हिसकावला. त्यानंतर त्याने जवळच उभ्या असलेल्या कारमधून त्याच्या साथीदारासह पलायन केले. या घटनेची माहिती मिळताच पनवेल शहर पोलिसांनी कारमधून पळून गेलेल्या चोरट्याचा शोध घेण्याचा प्रयत्न केला; मात्र ते पोलिसांच्या हाती लागले नाहीत.