बालकाचे अपहरण करणारा पोलिसांच्या ताब्यात

बालकाचे अपहरण करणारा पोलिसांच्या ताब्यात
कल्याण, ता. २८ (वार्ताहर) : पश्चिमेतील मुस्लिमबहुल भागात एका बालकाचे अपहरण करणाऱ्या युवकाला स्थानिकांच्या सतर्कतेमुळे रंगेहाथ पकडण्यात आले. आरोपी युवक अडीच वर्षांच्या मुलाला खांद्यावर घेऊन जाण्याचा प्रयत्न करीत होता. हे काही लोकांच्या लक्षात आल्याने पुढील अनर्थ टळला. लोकांनी मुलाला घेऊन चालणाऱ्याला आवाज देऊन हटकले असता आरोपीने मुलाला मागे सोडून पळून जाण्याचा प्रयत्न केला. दरम्यान, नागरिकांनी त्याला पकडून चौकशी केली असता त्याने कोणतेही समाधानकारक उत्तर दिले नाही. त्यानंतर त्या आरोपीला बाजारपेठ पोलिसांच्या ताब्यात देण्यात आले. पोलिसांनी आरोपीविरुद्ध बालकाच्या अपहरणाचा गुन्हा दाखल करून तपास सुरू केला आहे.

कोळीवाडा येथील हयात कॉम्प्लेक्सजवळ गुरुवारी (ता. २६) दुपारी एका घरात एक महिला स्वयंपाक करीत होती. त्या वेळी तिचा अडीच वर्षांचा मुलगा दारात उभा होता. अचानक करण कट्टी मणी नावाचा एक युवक आला आणि मुलाला खांद्यावर घेऊन जाऊ लागला. तिथे उपस्थित असलेल्या लोकांना करण कट्टी मणी संशयास्पद पद्धतीने मुलाला घेऊन जाताना दिसला. लोकांना त्याच्यावर संशय आल्याने त्याचे नाव विचारले; मात्र त्या मुलाने कोणतेही समाधानकारक उत्तर दिले नाही. तो मूल चोरण्याच्या उद्देशाने आला आहे, याची लोकांना खात्री पटल्यावर त्यांनी त्याला बाजारपेठ पोलिसांच्या ताब्यात दिले. पोलिसांनी आरोपीविरुद्ध बाल अपहरणाचा गुन्हा दाखल केला आहे. पोलिसांनी दिलेल्या माहितीनुसार करण कट्टी मणी हा सोलापूरचा रहिवासी आहे. त्याच्या खिशात सोलापूर-दादर ट्रेनचे तिकीट सापडले आहे. या गुन्ह्यासंदर्भात पोलिस अधिकारी सुरेशसिंग रामसिंग गौड अधिक तपास करीत आहेत.