नातेवाइकानेच लांबवला लाखोंचा मुद्देमाल

नवी मुंबई, ता. २८ (वार्ताहर) : वाशीतील जुहूगावात २० जूनला घडलेल्या साडेसात लाखांच्या घरफोडी प्रकरणाचा वाशी पोलिसांनी छडा लावून आरोपीला अटक केली आहे. ही घरफोडी तक्रारदाराचा नातेवाईक ओमकार विजय कदम (२२) यानेच केल्याचे तपासात आढळून आले आहे. त्यानुसार पोलिसांनी त्याच्याकडून चार लाख ७८ हजारांचा ऐवज हस्तगत केला आहे.
वाशीतील जुहूगावात राहणाऱ्या महेंद्र रोकडे (३७) यांचे घर २३ जूनला बंद असताना एका चोराने त्यांचे घर फोडून पाच लाख ६२ हजार किमतीचे सोन्याचे दागिने व एक लाख ८० हजारांची रोख रक्कम चोरून नेली होती. वाशी पोलिस ठाण्यात याबाबत गुन्हा दाखल झाल्यानंतर वरिष्ठ पोलिस निरीक्षक संजय धुमाळ यांच्या मार्गदर्शनाखाली सहाय्यक पोलिस निरीक्षक सत्यवान बिले व त्यांच्या पथकाने तातडीने घटनास्थळी भेट देऊन तपासाला सुरुवात केली. तसेच परिसरातील सीसीटीव्ही फुटेजची पाहणी केली. या तपासणीत महेंद्र रोकडे यांचा नातेवाईक ओमकार कदम याचा संशयास्पद वावर दिसून आला. पोलिसांना तो सुरत आणि पुढे उदयपूर, राजस्थान येथे गेल्याची माहिती मिळाली. वाशी पोलिसांचे पथक उदयपूर येथे रवाना करण्यात आले. या पथकाने आरोपी ओमकार कदम याचा रेल्वेस्थानक परिसरात शोध घेऊन त्याला ताब्यात घेतले. त्याच्या चौकशीत त्याने या गुन्ह्याची कबुली दिल्यानंतर त्याला अटक करण्यात आले आहे.
-----------------
जप्त केलेला ऐवज
पोलिसांनी आरोपी ओमकार कदम याच्याकडून १०.८८० ग्रॅमचा हार, १८ ग्रॅम वजनाच्या तीन अंगठ्या, आठ ग्रॅमचे दोन जोड रिंग, पाच ग्रॅमची कुडी, तीन ग्रॅमचे टॉप्स, एक ग्रॅमचे पेंडल, एक ग्रॅमची नथ व अन्य दागिने, रोख रक्कम ९६ हजार असे एकूण चार लाख ७८ हजार रुपये किमतीचा ऐवज हस्तगत केला आहे.