बार, वाइन शॉपच्या परवानगीची होणार चौकशी

खारघर, ता. २८ (बातमीदार) : खारघर परिसरात सुरू असलेल्या बार आणि वाइन दुकानांसंदर्भात खारघरमध्ये राज्य उत्पादन शुल्क विभाग, संघर्ष समिती आणि आमदारांच्या उपस्थितीत बैठक पार पडली. या बैठकीत संघर्ष समितीच्या पदाधिकाऱ्यांनी बार आणि वाइन दुकानाला परवानगी देताना नियमांचे उल्लंघन केल्याचे सांगितले. यासंदर्भात सात दिवसांत चौकशी करून माहिती दिली जाईल, असे आश्वासन राज्य उत्पादन शुल्क विभागाच्या अधिकाऱ्यांनी दिल्यामुळे बार आणि वाइन दुकानमालकांचे धाबे दणाणले आहेत.
वाइन दुकानाविरोधात रहिवाशांचा वाढता विरोध पाहून राज्य उत्पादन शुल्क विभागाच्या अधिकाऱ्यांसमवेत शुक्रवारी (ता. २७) खारघरमधील रामशेठ ठाकूर पब्लिक स्कूलमध्ये बैठक आयोजित करण्यात आली होती. या बैठकीत संघर्ष समितीच्या पदाधिकाऱ्यांनी माहिती अधिकारात मिळविलेल्या माहितीनुसार खारघरमधील बार आणि वाइन शॉप सुरू करताना सोसायटीची परवानगी आवश्यक असताना, बार आणि वाइन शॉप मालकाने परवानगी घेतली नसल्याचे निदर्शनास आणून दिले. दरम्यान, स्थलांतर झालेल्या वाइन दुकानासाठी सोसायटीच्या परवानगीची आवश्यकता नसल्याचे उत्तर राज्य उत्पादन शुल्क विभागाच्या अधिकाऱ्यांनी दिल्यावर आमदार आणि संघर्ष समितीच्या पदाधिकाऱ्यांनी त्यांना धारेवर धरले. यासंदर्भात चौकशीची मागणी केली असता, सात दिवसांत चौकशी करून माहिती दिली जाईल, असे राज्य उत्पादन शुल्क विभागाच्या अधिकाऱ्यांनी सांगितले. या बैठकीला आमदार प्रशांत ठाकूर, विक्रांत पाटील, माजी आमदार बाळाराम पाटील, भाजपचे प्रदेश सदस्य बाळासाहेब पाटील, राज्य उत्पादन शुल्क विभागाचे अधीक्षक रवीकिरण कोले, उपअधीक्षक भूतकर, निरीक्षक बी. डी. फणसेकर, खारघर संघर्ष समितीचे पदाधिकारी आणि इतर मान्यवर उपस्थित होते.
------------------
खारघरमधील जनतेची दारूमुक्त शहराची मागणी रास्त आहे. खारघरमध्ये सरकारने बार आणि वाइन दुकानाला दिलेल्या परवानग्या रद्द कराव्यात, अशी मागणी राज्य उत्पादन शुल्क विभागाकडे केली आहे. विधिमंडळात ठरावदेखील मांडणार असून, खारघरमध्ये दारूमुक्तीसाठी मतदान प्रक्रियेसाठी पाठपुरावा केला जाणार आहे. समितीच्या पदाधिकाऱ्यांसमवेत लवकरच उपमुख्यमंत्री अजित पवार यांची भेट घेणार आहे.
- प्रशांत ठाकूर, आमदार, पनवेल