सन्मानाने जगण्याचा मार्ग

प्रसाद जोशी ः सकाळ वृत्तसेवा
वसई, ता. २८ ः पालघर जिल्ह्यात महिला सक्षमीकरणाबरोबर ज्येष्ठांसह विद्यार्थ्यांसाठी विविध योजना राबवल्या जात आहेत. पण समाजकल्याणासाठी प्रार्थना करणारा तृतीयपंथी मात्र दुर्लक्षितच राहिला आहे. समाजातील अशा घटकाचे जीवनमान उंचावण्याबरोबर त्यांना मुख्य प्रवाहात आणताना बचत गटांच्या संकल्पनेतून वसई-विरार महापालिकेने सन्मानाने जगण्याचा मार्ग दाखवला आहे.
वसई-विरार शहरांत हजारांहून अधिक तृतीयपंथीयांचे वास्तव्य आहे. हा समाज मतदानाचा हक्क बजावत लोकशाहीत सहभागी होतो; मात्र त्यांच्याकडे पाहण्याचा अनेकांचा दृष्टिकोन नेहमीच वेगळा असतो. त्यामुळे समाजाचा घटक असून, मुख्य प्रवाहात नसलेल्या तृतीयपंथीयांना रोजगार, व्यवसायाची संधी मिळावी, यासाठी वसई-विरार महापालिकेकडून बचत गट तयार केले जात आहेत.
---------------------------------
५० जणांचा सहभाग
दीनदयाल अंत्योदय योजनेसाठीचे सर्वेक्षण, बैठकांमधून बचत गट तयार केले जात आहेत. त्यानुसार अतिरिक्त आयुक्त संजय हेरवाडे, उपायुक्त दीपक झिंजाड यांच्या मार्गदर्शनाखाली दीनदयाल अंत्योदय योजनेच्या शहर व्यवस्थापिका रूपाली कदम यांच्या पथकाकडून २०० जणांशी संपर्क करण्यात आला असून, ५० तृतीयपंथी बचत गटात सहभागी होण्यासाठी पुढे आले आहेत
--------------------------------------------------
कौशल्य मांडण्याची संधी
वसई -विरार शहर महापालिकेच्या बचत गट उपक्रमामुळे विविध लघु उद्योगांबरोबर उद्यान देखभालीसह मालमत्ता कर देयके वाटप यासह अन्य कामे तसेच स्वयंरोजगाराची विविध दालने खुली होणार आहेत. त्यामुळे ज्या प्रकारे अंध, अपंग, कर्णबधिर, मूकबधिरांप्रमाणे कल्याणकारी योजनांचा लाभ घेताना तृतीयपंथी बचत गटाला संघटित होऊन काम करता येणार आहे. तसेच स्वतःमधील कौशल्य जगासमोर मांडण्यासाठीचे व्यासपीठदेखील उपलब्ध झाले आहे.
----------
वसई-विरार शहर महापालिकेने महिला बचत गट, दिव्यांग बचत गट तयार केले आहेत. आता तृतीयपंथींसाठी बचत गट तयार केले जाणार आहेत. या माध्यमातून त्यांना रोजगार, स्वतःचा व्यवसाय करता येणार असून, प्रशासनाकडून सर्वतोपरी मदत दिली जाणार आहे.
- संजय हेरवाडे, अतिरिक्त आयुक्त, वसई-विरार महापालिका
--------------
वसई-विरार महापालिकेचे आयुक्त अनिलकुमार पवार यांनी तृतीयपंथी बचत गट संकल्पना प्रत्यक्षात आणण्यासाठी प्रयत्न केले. त्यामुळे रोजगार, व्यवसायाची संधी मिळेल तसेच मुख्य प्रवाहातून बाहेर फेकलेला तृतीयपंथी समाज सन्मानाने जगू शकेल.
- पद्मा दीदी, तृतीयपंथी