नवी मुंबई पालिकेला ए ए + मानांकन

वाशी, ता. २९ (बातमीदार) : इंडिया रेटिंग अँड रिसर्च (फिच) या राष्ट्रीय स्तरावरील अर्थविषयक मान्यताप्राप्त संस्थेच्या वतीने प्रतिवर्षी विविध संस्थांचे पत मानांकन जाहीर करण्यात येते. यामध्ये मागील १० वर्षांप्रमाणेच इंडिया डबल ए प्लस स्टेबल हे सर्वोत्तम पत मानांकन नवी मुंबई महापालिकेस २०२४-२५ या वर्षाकरिता जाहीर झाले आहे. आर्थिक सक्षमतेचे डबल ए प्लस मानांकन सातत्याने ११ वर्षे मिळविणारी नवी मुंबई ही देशातील एकमेव महापालिका आहे.
नवी मुंबई महापालिकेकडे राज्य सरकार, एमएमआरडीए, एमआयडीसी यापैकी कोणाचेही कर्ज, व्याज अथवा कर थकीत नाही.
देशातील निवासयोग्य शहरांमध्ये आघाडीवर असणाऱ्या नवी मुंबई महापालिकेने नागरिकांसाठी पुरविण्यात येणाऱ्या सेवासुविधांच्या दर्जाकडे बारकाईने लक्ष देत नेहमीच दूरगामी दृष्टिकोन राखला आहे. महसूलविषयक जमा व खर्चाच्या बाबींकडेही काटेकोर लक्ष दिले आहे. जमा-खर्चाचा योग्य ताळमेळ राखण्याकडे आयुक्त डॉ. कैलास शिंदे यांचे बारकाईने लक्ष असून, त्याला मुख्य लेखा व वित्त अधिकारी सत्यवान उबाळे यांच्या नियंत्रणाखाली संपूर्ण लेखा विभागाची सुयोग्य साथ लाभत आहे. त्यामुळेच हे सर्वोत्तम आर्थिक पत मानांकन याही वर्षी लाभले आहे.