बारा दिवस दर्याला उधाण

वसई, ता. २९ (बातमीदार)ः पावसाळी पर्यटनासाठी अनेकांचा कल पालघर जिल्ह्यातील समुद्रकिनाऱ्यांकडे असतो, मात्र जुलैमध्ये १२ दिवस साडेचार मीटरपेक्षा अधिक उंचीच्या लाटा येणार असल्याने किनाऱ्यालगतची वस्ती तसेच पर्यटकांसाठी धोक्याचा इशारा देण्यात आला आहे.
पावसाळ्यात खोल समुद्रातील मासेमारी बंद आहे. अशातच आता समुद्रालगतच्या पारंपरिक मासेमारीवरदेखील बंदी टाकण्यात आली आहे. त्यामुळे मच्छीमारांसमोर विविध आव्हाने उभी ठाकली आहेत. अशातच अर्नाळा येथे लाटांचा मारा, जोरदार वाऱ्यामुळे किनारी वस्तीलगतच्या अनेक घरांचे पत्रे उडाले, तर काही ठिकाणी पाणी शिरल्याने नुकसान झाले आहे. असाच काहीसा प्रकार भुईगाव येथेही झाला आहे. या परिसरातील सुरूची झाडे उन्मळून पडली होती, तर वसईतील रानगाव पाठोपाठ उंच लाटांमुळे समुद्राचे पाणी थेट वस्तीत शिरल्याने सातपाटी येथील मालमत्तांचे नुकसान झाले आहे. अशातच समुद्रालगतच्या कोळीवाड्यांना नवीन संकटाला सामोरे जावे लागण्याची शक्यता आहे. कारण किनाऱ्यालगतच्या लोकवस्तीवर उंच लाटांचे संकट घोंघावले असून, जुलैमधील १२ दिवस समुद्रात साडेचार मीटरपेक्षा अधिक उंचीच्या लाटा उसळण्याची शक्यता प्रशासनाने वर्तवली आहे.
------------------------------------
प्रपंच चालवणे कठीण
अर्नाळा, सातपाटी, पाचूबंदर, नायगाव, डहाणूसह किनाऱ्यालगत असणारे मच्छीमार बांधव मासेमारीवर उदरनिर्वाह करतात. सध्या जोरदार वारा आणि उंचच उंच लाटांमुळे मासेमारी बंद करण्यात आली आहे. अशातच रोजगाराचे कोणतेही साधन नसताना प्रपंच चालवणे कठीण झाले आहे. त्यात आता दर्याला येणाऱ्या उधाणाचे पाणी थेट घरातच शिरत असल्याने आर्थिक नुकसानीमुळे शासनाने उपाययोजना करण्यात याव्यात, अशी मागणी होत आहे.
-------------
समुद्रातील उंच लाटांमुळे नागरिकांच्या मालमत्तेची हानी झाली होती. यापासून बचावासाठी तसेच नागरिकांना सुरक्षिततेची हमी मिळावी, म्हणून पणन विभाग, मत्स्य विभागाशी चर्चा करण्यात आली आहे. तसेच समुद्रालगत राहणाऱ्यांना शासनाने मदत करावी, अशी मागणी केली आहे.
- बर्नड डिमेलो, कार्याध्यक्ष, अखिल महाराष्ट्र मच्छीमार कृती समिती
-------------
पालघर जिल्ह्यात जुलैमध्ये समुद्राला उधाण येणार आहे. यावर धूपप्रतिबंधक बंधारे उभारणे हा पर्याय असून, घरात पाणी शिरल्याने होणारे आर्थिक नुकसान टाळण्यासाठी पणन विभागामार्फत विविध उपाययोजनांवर भर दिला जात आहे.
-दीनेश पाटील, सहाय्यक आयुक्त, मत्स्यव्यवसाय विभाग
---------------
जुलैमधील उधाणीचे दिवस
वार दिनांक वेळ उंची मीटरमध्ये
गुरुवार - १० १२:३९ ४.५६
शुक्रवार - ११ १३:१३ ४.७२
शनिवार - १२ १३:४७ ४.८३
रविवार - १३ १४:२० ४.८७
सोमवार - १४ १४:५४ ४.८३
मंगळवार - १५ १५:२५ ४.७०
बुधवार - २३ ११:३९ ४. ६६
गुरुवार - २४ १२:२३ ४.८०
शुक्रवार - २५ १३:०४ ४.८७
शनिवार - २६ १३:४२ ४.८७
रविवार - २७ १४:१८ ४.७८
सोमवार - २८ १४:५० ४.६१
----------