पामबीच मार्गावर डेब्रिजचे ढीग

जुईनगर, ता. ३० (बातमीदार) : बेलापूर ते कोपरीगावापर्यंत असलेल्या पाम बीच मार्गाला नवी मुंबईचा नेकलेस समजण्यात येतो; मात्र मार्गावर डेब्रिजचे ढीग टाकण्यात येत असल्याने कारवाई करण्याची मागणी पर्यावरणप्रेमी करत आहेत. सीवूड्स ते सानपाडा परिसरात पाम बीच मार्गाला लागून टोलेजंग इमारती बांधण्यात आल्या आहेत. या मार्गावरील इमारतींमध्ये नूतनीकरण करताना तोडफोड केल्यावर निघालेले डेब्रिज कंत्राटदाराने जागा मिळेल तिथे टाकल्याने तीव्र नाराजी व्यक्त करण्यात येत आहे.
सानपाडा-मोराज या दिशेने नेरूळकडे येणाऱ्या वळण रस्त्यावर पाण्याच्या जलवाहिनीलगत डेब्रिज टाकले गेले आहे, शिवाय नाल्यालगत डेब्रिज असल्याने नाला बुजवणाऱ्या भूमाफियांचा हा डाव तर नाही ना, असा प्रश्न पर्यावरणप्रेमी विचारत आहेत. हा खारफुटी परिसर असल्याने या ठिकाणी टाकण्यात येणाऱ्या डेब्रिजमुळे परिसराला धोका पोहोचत आहे. महापालिका अधिकाऱ्यांचे दुर्लक्ष याला जबाबदार असल्याची चर्चा नागरिक करत आहेत. विनापरवाना डेब्रिज वाहतूकदेखील बेकायदा आहे. पालिकेने नेमून दिलेल्या जागेवर डेब्रिज टाकणे बंधनकारक आहे. नियमबाह्य डेब्रिज वाहतूक करणे अथवा डेब्रिज टाकणाऱ्या लोकांना नोटीस बजावून कठोर कारवाई करण्यात येते; मात्र पालिका अधिकाऱ्यांना हाताशी धरून ही कामे केली जात असल्याचा आरोप नागरिक करत आहेत. त्यामुळे येथे डेब्रिज टाकणारे कोण? या डेब्रिज टाकणाऱ्या कंत्राटदार अथवा भूमाफियांचा शोध घेऊन त्वरित कारवाईची मागणी होत आहे.