ऑनलाइन फसवणुकीचा पोलिसांकडून छडा

अलिबाग, ता. ३० (वार्ताहर ) ः काही वर्षांपासून ऑनलाइन फसवणुकीचे प्रकार वाढले असून, यामध्ये अनेक नागरिकांना कोट्यवधी रुपये गमवावे लागले आहेत. लॉटरी लागल्याचे सांगून फसवणूक केलेल्या दोघांना सायबर पोलिसांनी त्यांचे पैसे परत मिळवून दिले आहे. अलिबाग तालुक्यातील दोन वेगवेगळ्या फसवणुकीच्या गुन्ह्यांमध्ये एक लाख ६८ हजार ४९९ रुपये परत मिळवून देण्यात सायबर पोलिसांना यश आले आहे.
अलिबाग येथील आदर्श कट्टा येथे वेटरचे काम करणारे प्रदीप कुमार यांना २३ मार्चला ऑनलाइन लॉटरी लागल्‍याचा फोन आला होता. प्रदीप कुमार यांनी आनंदाच्या भरात आपल्‍या बँकखात्‍याचे तपशील दिले. त्यानंतर मोबाईलवर आलेला ओटीपी सांगितल्याने काही अवधीतच त्‍यांच्या बँक खात्यातून ६० हजार रुपये डेबिट झाल्याचा मेसेज आला. आपल्यासोबत फसवणूक झाल्याचे लक्षात येताच प्रदीप यांनी सायबर पोलिस ठाण्यात धाव घेतली. पोलिसांनी तत्काळ गुन्हा दाखल करीत प्रदीप यांची रक्कम परत मिळवून दिली.
दुसऱ्या प्रकरणात रेवदंडा येथील रंजना विश्वास गायकर यांना, एप्रिलमध्ये एक कोटी रुपयांची लॉटरी लागल्याचा फोन आला होता, मात्र ही रक्‍कम मिळवण्यासाठी एक लाख आठ हजार ४९९ रुपयांचा कर भरावा लागेल, असे सांगण्यात आले. त्यांनी हे पैसे भरले, मात्र त्यानंतरही रंजना यांच्या बँक खात्यात पैसे जमा झाले नाही. फसवणूक झाल्‍याचे लक्षात येताच, रंजना यांनी अलिबाग येथील सायबर पोलिस ठाण्यात धाव घेतली. गुन्हा दाखल होताच अवघ्या काही दिवसांतच सायबर पोलिसांनी एक लाख आठ हजार ४९९ रुपयांची रक्कम परत मिळवून दिली. रक्कम परत मिळाल्याने प्रदीप कुमार व रंजना गायकर यांनी सायबर पोलिसांचे आभार मानले आहेत.

२४ तासांत नोंदवा तक्रार
कोणत्याही प्रकारची आर्थिक फसवणूक झाल्यास १९३० क्रमांकावर संपर्क साधावा किंवा शक्य असल्यास जिल्हा पोलिस अधीक्षक कार्यालयातील सायबर सेलमध्ये येऊन तक्रार नोंदवावी. २४ तासांच्या आत तक्रार नोंदवल्यास तातडीने रक्कम मिळण्यास मदत होते. त्याचप्रमाणे cybercrime.gov.in. या वेबसाईटवरही नागरिक आपली तक्रार नोंदवू शकतात.