डीजेवर धारदार शस्त्राने वार

डीजे व्यावसायिकावर धारदार शस्त्राने वार
टिटवाळा, ता. ३० (वार्ताहर) : शहरातील साईनगरमध्ये हळदी समारंभ संपल्यानंतर अचानक झालेल्या वादातून एका डीजे व्यावसायिकावर जीवघेणा हल्ला करण्यात आला. धारदार शस्त्राने पाठीत वार केल्याने तो गंभीर जखमी झाला आहे. त्याच्यावर निरामय रुग्णालयात उपचार सुरू आहेत.
संदीप राजाराम मढवी (वय ४१) असे जखमीचे नाव असून, ते स्थानिक डीजे व मंडप व्यावसायिक आहेत. शनिवारी (ता. २८) ९० फुटी रोडवरील हळदी समारंभासाठी डीजे आणि मंडप सेवा पुरवली होती. कार्यक्रम पार पडल्यानंतर रविवारी (ता. २९) मध्यरात्री एकच्या सुमारास अभय उर्फ मुन्ना वायाळ आणि चेतन सपकाळ यांच्यात काही कारणावरून वाद निर्माण झाला. संदीप मढवी यांनी वाद मिटवण्यासाठी मध्यस्थी करण्याचा प्रयत्न केला; मात्र याचा राग मनात ठेवून चेतन सपकाळ, त्याचा भाऊ हर्ष सपकाळ, आर्यन पवार आणि विघ्नेश राठोड यांनी मढवी यांना बेदम मारहाण केली. या झटापटीदरम्यान हर्ष सपकाळ याने धारदार शस्त्राने मढवी यांच्या पाठीत वार केला. पीयूष मढवी यांच्या तत्परतेमुळे त्यांना तातडीने रुग्णालयात दाखल करण्यात आले. याप्रकरणी टिटवाळा पोलिस ठाण्यात गुन्हा दाखल केला आहे.