पंढरपूरसाठी एसटीची भाईंदरहून विशेष सेवा

भाईंदर, ता. १ (बातमीदार) : आषाढी एकादशीनिमित्त एसटी महामंडळाने भाईंदर ते पंढरपूर ही विशेष बससेवा सुरू केली आहे. ही बस बुधवारी (ता. २) भाईंदर पश्चिम रेल्वे स्थानकाजवळून सकाळी सात वाजता पंढरपूरकडे रवाना होणार आहे. १० जुलैपर्यंत ही सेवा सुरू राहाणार आहे.

आषाढी एकादशीनिमित्त अनेक वारकरी मिरा-भाईंदरहून पंढरपूरला जातात. त्यांच्यासाठी भाईंदरहून एसटीची बस सोडण्यात यावी, अशी विनंती शिवसेना शिंदे गटाचे नेते जितेंद्र पाठक यांनी परिवहनमंत्री प्रताप सरनाईक यांच्याकडे केली होती. सरनाईक यांनी ही बस सुरू करण्याच्या सूचना एसटी महामंडळाच्या अधिकाऱ्यांना दिल्या होत्या. त्यानुसार २ ते १० जुलैपर्यंत भाईंदर पश्चिम रेल्वे स्थानकाजवळील एसटी स्थानकातून दररोज सकाळी सात वाजता ही विशेष बससेवा सुरू राहाणार आहे. या सेवेचा मिरा-भाईंदरमधील वारकऱ्यांनी लाभ घ्यावा, असे आवाहन पाठक यांनी केले आहे.