मंजूनाथ वाणिज्य महाविद्यालयात अंमली पदार्थ विरोधात जनजागृती

मंजूनाथ वाणिज्य महाविद्यालयात अमली पदार्थांविरोधात जनजागृती
कल्याण, ता. १ (वार्ताहर) : नशामुक्त भारत अभियानांतर्गत राष्ट्रीय सेवा योजना, मंजूनाथ वाणिज्य महाविद्यालय, ठाकुर्ली आणि नशाबंदी मंडळ, महाराष्ट्र यांच्या संयुक्त विद्यमाने आंतरराष्ट्रीय अमली पदार्थ विरोधी शपथ व मार्गदर्शन कार्यक्रमाचे आयोजन केले होते. या वेळी नशाबंदी मंडळाचे पालघर जिल्हा संघटक मिलिंद पाटील यांनी उपस्थितांना मार्गदर्शन केले.
मिलिंद पाटील यांनी मार्गदर्शनात युवकांना तंबाखू व तंबाखूजन्य पदार्थांच्या व्यसनांचा समाजावर मोठा परिणाम होत आहे. अनेकांना कर्करोगासारख्या आजारांना सामोरे जावे लागत आहे. युवकांनी व्यसन केल्यास त्याचा परिणाम आरोग्यासह शिक्षणावरही होत आहे. आपल्या परिसरात अशा अमली पदार्थांची विक्री अथवा वापर होणार नाही यासाठी आपण सर्वांनीच सतर्क राहून राष्ट्रीय कार्यात हातभार लावण्याचे आवाहन त्यांनी केले.
या वेळी मंजूनाथ वाणिज्य महाविद्यालयाचे प्राचार्य डॉ. सुशीला विजयकुमार, राष्ट्रीय सेवा योजनेचे प्रोग्राम अधिकारी प्रा. शिवकुमार यादव, राष्ट्रीय सेवा योजनेचे युवक सहभागी होते. कार्यक्रमाची सांगता अमली पदार्थ विरोधी शपथ देऊन करण्यात आली.