डेटींग अ‍ॅपमधून फसवणुकीचा भांडाफोड

अंधेरी, ता. ७ (बातमीदार)ः डेटिंग अ‍ॅपद्वारे हॉटेलमध्ये बोलावून ऑनलाइन गंडा घालणाऱ्या टोळीला नवी मुंबईतील एका हॉटेलमधून पोलिसांनी अटक केली आहे. यामध्ये सहा तरुणींसह एकवीस जणांचा समावेश आहे.
सांताक्रूझ येथील तरुणाची अशाच एका ॲपच्या माध्यमातून फसवणूक झाली होती. या तरुणाची दिशा शर्माशी ओळख झाली होती. या ओळखीनंतर दोघेही चांगले मित्र झाले होते. १२ एप्रिलला दोघेही बोरिवलीतील एका हॉटेलमध्ये भेटले होते. तिथे त्यांनी जेवणासह हुक्का मागवला होता. त्या वेळी ३५ हजारांचे बिल झाल्याने दोघांनी समान पैसे दिले होते. त्यानंतर दिशा तेथून निघून गेली होती. घरी आल्यानंतर ऑनलाइन पेमेंट हॉटेलच्या नावाने नाहीतर दुसऱ्या व्यक्तीच्या नावाने ट्रान्स्फर झाल्याचे समजले. त्यानंतर याप्रकरणी दिशासह इतर आरोपीविरुद्ध तक्रार दाखल झाली होती. या तक्रारीनंतर पोलिसांनी फसवणुकीसह आयटी कलमांतर्गत गुन्हा नोंदवून तपास सुरू केला होता. आरोपीच्या मोबाईलचे सीडीआर आणि करंट लोकेशनची माहिती घेताना ही टोळी नवी मुंबईत असल्याचे उघडकीस आले होते. त्यानंतर पोलिसांच्या पथकाने नवी मुंबईतील एका हॉटेलमध्ये छापा टाकून एकवीस जणांना ताब्यात घेतले. त्यात सहा तरुणींचा समावेश होता.
-----------------------------------
देशभरातील गुन्ह्यांची उकल
अटक केलेले आरोपी दिल्ली आणि उत्तर प्रदेशचे रहिवासी आहेत. या टोळीने डेटिंग अ‍ॅपच्या माध्यमातून अनेक तरुणांना जाळ्यात ओढून त्यांना विविध हॉटेलमध्ये बोलावून त्यांची ऑनलाइन फसवणूक केल्याचे उघडकीस आले. त्यांना बोरिवलीतील स्थानिक न्यायालयात हजर करण्यात आले होते. या वेळी न्यायालयाने त्यांना पोलिस कोठडी सुनावली आहे. या कारवाईत पोलिसांनी मोठ्या प्रमाणात बोगस दस्तऐवज, कॅश, मोबाईल, बँकेचे डेबिट व क्रेडिट कार्ड आदी मुद्देमाल जप्त केला आहे. या आरोपींची चौकशी सुरू असून, मुंबईसह देशभरातील गुन्ह्यांची उकल होण्याची शक्यता आहे.