दररोज साडेचार हजारांहून अधिक चाचण्या होणार

कूपर रुग्णालयात रक्त चाचणीसाठी अद्ययावत यंत्रणा
दररोज साडेचार हजारांहून अधिक चाचण्या होणार
सकाळ वृत्तसेवा
मुंबई, ता. १० : पश्चिम उपनगरांतील नागरिकांसाठी रक्त चाचणी अद्ययावत सुविधा मुंबई महापालिकेच्या कूपर रुग्णालयात उपलब्ध झाली आहे. आर्थिकदृष्ट्या गरजू रुग्णांसाठी दर्जेदार आरोग्यसेवा उपलब्ध करून देण्याच्या दृष्टीने हे एक महत्त्वपूर्ण पाऊल आहे. अद्ययावत आणि अधिक क्षमता असलेल्या रक्तातील बायोकेमिस्ट्री विश्लेषण करणाऱ्या स्वयंचलित संयंत्राचा अधिष्ठाता डॉ. सुधीर मेढेकर यांच्या उपस्थितीत नुकताच पार पडला.
रक्त चाचणीच्या माध्यमातून निदान हा आरोग्यसेवेमधील अत्यंत महत्त्वाचा भाग आहे. संयंत्राच्या लोकार्पण कार्यक्रमासाठी इंडियन ऑइल कॉर्पोरेशन लिमिटेडचे प्रतिनिधी संजीव रंजन, विजय तावडे आणि चाइल्ड हेल्थ फाउंडेशनचे कार्यकारी संचालक जिजी जॉन, अब्दुल बेग आदी मान्यवरांसह रुग्णालयाच्या विविध विभागांचे प्रमुख या वेळी उपस्थित होते. रक्तातील बायोकेमिस्ट्री विश्लेषण करणाऱ्या स्वयंचलित संयंत्रासाठी इंडियन ऑइल कॉर्पोरेशन लिमिटेड कंपनीमार्फत कॉर्पोरेट सामाजिक बांधिलकी (सीएसआर) अंतर्गत अर्थसाह्य प्राप्त झाले आहे. चाइल्ड हेल्थ फाउंडेशन संस्थेने हा प्रकल्प कार्यान्वित केला आहे.
एकाच वेळी अनेक प्रकारचे रक्ताचे नमुने जलद गतीने विश्लेषण करण्याची या संयंत्राची क्षमता आहे. शिवाय रोगनिदान रक्त चाचणीची माहिती संयंत्रामध्ये साठवता येणे शक्य आहे. परिणामी, डॉक्टरांना वैद्यकीय परीक्षण आणि योग्य निदान व उपचार करण्यासाठी हे संयंत्र उपयुक्त ठरणार आहे. त्यामुळे रुग्णांना अचूक उपचार देणे शक्य होईल, अशी माहिती बायोकेमिस्ट्री विभागाचे प्रमुख डॉ. शिवाजी माने यांनी दिली.
दिवसापोटी रक्त चाचणी प्रयोगशाळेत चार हजार ५०० ते ५,००० इतक्या रक्ताच्या नमुन्यांची चाचणी होते. तसेच वर्षभरात १२ लाखांहून अधिक रक्त चाचणी नमुने प्रयोगशाळेतून तपासले जातात. रुग्णालयात रक्त चाचणीसाठी दैनंदिन उपलब्ध होणाऱ्या रक्ताच्या नमुन्यांपेक्षा अधिक संख्येने रक्त चाचणीचे नमुने तपासणे या संयंत्रामुळे शक्य होणार आहे.