कचऱ्यापासून बायोगॅस

कचऱ्यापासून बायोगॅस
पालिका नेमणार सल्लागार
सकाळ वृत्तसेवा
ठाणे, ता. ७ : पालिका क्षेत्रात कचऱ्याचा प्रश्न दिवसेंदिवस गंभीर होत असताना दुसरीकडे पालिकेने ओल्या कचऱ्यापासून बायोगॅस प्रकल्प उभारण्याचा निर्णय घेतला आहे. त्या संदर्भातील प्रस्तावदेखील पालिकेने मंजूर केला आहे. आता हा प्रकल्प कार्यान्वित करण्यासाठी सल्लागार नेमण्यात येणार आहे. विशेष म्हणजे या सल्लागारावर पालिका एक रुपयादेखील खर्च करणार नाही.

ठाणे पालिका क्षेत्रातील कचराप्रश्न सोडविण्यासाठी पालिका प्रशासनाकडून विविध उपाययोजना करण्यात येत आहेत. त्यात आतकोली येथे शासनामार्फत मिळालेल्या जागेत कचरा प्रकल्प सुरू केल्यानंतर शहरातील कचरप्रश्न काही अंशी निकाली निघण्यास सुरुवात झाली आहे. आता त्या ठिकाणी १५ एकर जमिनीवर तब्बल ५०० टन प्रतिदिन क्षमतेचा बायोगॅस प्रकल्प उभारण्यात येणार आहे. यासंदर्भातील प्रस्ताव नुकत्याच झालेल्या प्रशासकीय महासभेत मंजूर करण्यात आला आहे. त्यात हा प्रकल्प सुरू करण्यासाठी आणि यशस्वी करण्यासाठी या ठिकाणी सल्लागाराची नियुक्ती करण्याचा प्रस्तावही नुकत्याच झालेल्या प्रशासकीय महासभेत मंजूर केला आहे. येथील प्रकल्प हा पीपीपी तत्त्वावर उभारला जाणार आहे. त्यामुळे येथील कामासाठी नेमल्या जाणाऱ्या ठेकेदाराला कोणत्याही स्वरूपाचा खर्च पालिका करणार नाही. त्याचा खर्च हा संबंधित ठेकेदारालाच करावा लागणार आहे. सल्लागाराकडून डिटेल प्रोजेक्ट रिपोर्ट, डिटेल फिजीबीलीटी रिपोर्ट तयार करावा लागणार आहे. एकूणच येथे सुरू करण्यात येणारा बायोगॅसचा प्रकल्प हा व्यवहार्य आहे का? याची चाचपणी केली जाणार आहे.

महापालिका हद्दीत १२०० मेट्रिक टन कचऱ्याची निर्मिती होत आहे. त्यात साधारणपणे ५० टक्के ओल्या कचऱ्याचा समावेश आहे. सद्यःस्थितीत ओल्या कचऱ्यापासून खतनिर्मिती करण्यासाठी विकेंद्रित पद्धतीने महापालिका हद्दीत प्रत्येकी पाच टन क्षमतेचे विविध तंत्रज्ञानावर आधारित १६ प्रकल्प कार्यान्वित आहेत. त्याद्वारे सुमारे ८० मेट्रिक टन ओल्या कचऱ्याचे व्यवस्थापन करण्यात येत आहे.