मुदतबाह्य औषधांचे होणार संकलन

मुदतबाह्य औषधांचे होणार संकलन
कल्याण, ता. १० (बातमीदार) : मुदतबाह्य औषधांचे संकलन व त्याची शास्त्रीय विल्हेवाट लावण्यासाठी टेकबॅक या उपक्रमाची सुरुवात करण्यात आली आहे. महाराष्ट्र राज्य औषध विक्रेता संघटनेचे अध्यक्ष जगन्नाथ शिंदे यांच्या ‘पर्यावरण वाचवूया औषधांचा गैरवापर टाळूया!’ या संकल्पनेतून हा उपक्रम राबविण्यात येत आहे.

केंद्र सरकारच्या स्वास्थ्य आणि कुटुंब कल्याण मंत्रालयाच्या सेंट्रल ट्रक स्टॅंडर्ड कंट्रोल ऑर्गनायझेशनद्वारे नुकतेच मे महिन्यात सर्व राज्यांच्या औषध नियंत्रकांना मुदतबाह्य तसेच न वापरलेल्या औषधांची शास्त्रीय विल्हेवाट लावण्याबाबत परिपत्रक आणि विस्तृत मार्गदर्शक तत्त्वे जारी केली होती. त्यानुसार स्थानिक स्वराज्य संस्था, महापालिका यांच्यासोबत केमिस्ट असोसिएशनच्या सहभागातून पर्यावरणाला तसेच समाज आरोग्याला घातक ठरणाऱ्या मुदतबाह्य व शिल्लक औषधांची शास्त्रीय विल्हेवाट लावण्यासाठी महाराष्ट्र राज्य केमिस्ट आणि ड्रगिस्ट असोसिएशन हे प्रत्येक केमिस्ट सभासदाकडे ग्रीन ड्रॉप बॉक्सची सुविधा ग्राहकांसाठी देणार असल्याचे जगन्नाथ शिंदे यांनी सांगितले.

मुदतबाह्य किंवा न वापरलेली अयोग्य अशी औषधे कचऱ्यात, गटारात वा रस्त्यावर फेकली जात आहेत. अशा औषधांमुळे प्रदूषणाला हातभार लागतो. हे प्रदूषण टाळण्यासाठी अशी औषधे कचऱ्यात न टाकता परिसरातील केमिस्टकडे आणून द्या. प्रदूषण टाळण्यासाठी, त्याची बायो वेस्ट या यंत्रणेमार्फत केमिस्ट असोसिएशनमार्फत विल्हेवाट लावली जाणार आहे. अशी माहिती त्यांनी या वेळी दिली.

प्रत्येक मेडिकलमध्ये ग्रीन ड्रॉप बॉक्स
कल्याण शहरात सुमारे ८०० व ठाणे जिल्ह्यात जवळपास ५००० मेडिकल दुकाने आहेत. या प्रत्येक मेडिकल दुकानांमध्ये एक ग्रीन ड्रॉप बॉक्स देऊन येणाऱ्या ग्राहकांकडून मुदतबाह्य औषधांचे संकलन करण्याचा संकल्प असोसिएशनने गुरुपौर्णिमेचे औचित्य साधून केला आहे. मुदतबाह्य औषधांमुळे प्रदूषण होऊन मानवी आरोग्याला धोका निर्माण होत आहे. प्रत्येक मेडिकलमध्ये मुदतबाह्य औषध साठवणुकीसाठीची सोय केली आहे.