घोडबंदर रस्त्याचे दायित्व पालिकेकडे

सकाळ वृत्तसेवा
ठाणे, ता. १० : पालिका क्षेत्रातून मुंबई-नाशिक आणि घोडबंदरमार्गे वसई-गुजरातच्या दिशेने जाणाऱ्या महामार्गावरील गायमुख ते फाउंटनपर्यंतचा रस्ता मिरा-भाईंदर पालिकेकडे, तर गायमुख ते कापूरबावडीपर्यंतचा रस्ता ठाणे पालिकेकडे हस्तांतरित करण्याच्या हालचाली सुरू आहेत. त्यामु‍ळे लवकरच हा महामार्ग पालिकेच्या अधिपत्याखाली येण्याची शक्यता आहे.
ठाणे-घोडबंदर महामार्ग २००१ मध्ये बांधा, वापरा आणि हस्तांतरित करा या तत्त्वावर खासगी विकसकाडून बांधण्यात आला. या मार्गावर २३ फेब्रुवारी २०२१ पर्यंत टोल वसूल केला जात होता. त्यानंतर एमएसआरडीसीने सार्वजनिक बांधकाम विभागाकडे हा रस्ता हस्तांतरित केला. त्या वेळी फाउंटन हॉटेल ते गायमूखपर्यंतचा ४.४० किलोमीटर लांबीचा रस्ता मिरा-भाईंदरकडे हस्तांतरित करण्यात आला, पण या रस्त्याच्या दुरुस्तीची कामे आजही सार्वजनिक बांधकाम विभागाकडून करण्यात येत आहेत. आता गायमुख ते कापूरबावडीपर्यंतचा १०.५० किलोमीटर लांबीचा रस्ता ठाणे महापालिकेकडे हस्तांतरित करण्याचा प्रस्ताव सार्वजनिक बांधकाम विभागाने तयार केला आहे. तसा प्रस्ताव सार्वजनिक बांधकाम विभागाने पालिका प्रशासनाला दिला आहे, मात्र पालिकेकडून कोणताही निर्णय घेण्यात आला नसल्यामुळे पुन्हा पत्रप्रंपच करण्यात आला आहे.
-----------------------------------
समन्वयात अडचणी
ठाण्यातील कापूरबावडी ते गायमुखपर्यंत दोन मार्गिका काँक्रीटच्या, तर एक मार्गिका डांबराची आहे. या मार्गावर मेट्रोचे काम सुरू आहे. या रस्त्याच्या दोन्ही बाजूला असलेला सेवा रस्ता यापूर्वीच एमएसआरडीसीने ठाणे पालिकेकडे वर्ग केला आहे. तसेच विविध सेवा रस्ता पालिकेशी संबंधित आहेत. त्यामुळे कामात ठाणे पालिका आणि एमएमआरडीए यांच्यात योग्य समन्वय राहावा, यासाठी ठाणे पालिकेकडे हस्तांतरित करण्याची सूचना सार्वजनिक बांधकाम विभागाचे अतिरिक्त मुख्य सचिवांनी केली होती.