कुटुंबावर कोसळले घराचे छत

कुटुंबावर कोसळले घराचे छत
कल्याण, ता. १४ (बातमीदार) : पूर्वेतील गणेशनगर भागात एका घराचे जीर्ण झालेले छप्पर कोसळल्याची दुर्घटना रविवारी (ता. १३) सकाळच्या सुमारास घडली. नरेश रंगारे हे आपल्या कुटुंबीयांसह दुर्वांकुर सोसायटीत वास्तव्यास आहेत. कौलारू घरातील जीर्ण व वाळवी लागलेले वासे तुटल्याने घरावरील छत कोसळले. या घटनेत कोणतीही जीवितहानी झाली नसली तरी घराचे मोठ्या प्रमाणावर नुकसान झाले आहे.

कुटुंबप्रमुख नरेश रंगारे हे त्यांची पत्नी व तीन लहान मुलांसह चाळीतील कौलारू घरात राहतात. शनिवारी रात्री जेवण करून रंगारे कुटुंबीय झोपी गेले होते; मात्र जीर्ण घराचे लाकडी वासे वाळवीमुळे कमकुवत होऊन डोक्यावर संकट म्हणून घोंघावत होते. रंगारे यांनी या आधी घरांची तात्पुरती दुरुस्ती केली होती; मात्र रविवारी सकाळी ६ च्या सुमारास कमकुवत वाशांना भिजलेल्या कौलांचा भार सहन न झाल्याने घराचे छत कोसळून अंगावर आले. नशीब बलवत्तर म्हणून या दुर्घटनेतून रंगारे कुटुंबीय सुखरूप बचावले; मात्र रंगारे यांच्या पत्नीच्या डोक्याला किरकोळ दुखापत झाली. योगायोगाने सर्दीमुळे बॅग डोक्यावर घेतल्याने लहान मुलगाही सुखरूप बचावला. घटनेची माहिती मिळताच स्थानिक माजी नगरसेविका सुशीला माळी यांनी कुटुंबीयांची भेट घेतली, तसेच त्यांना डागडुजीसाठी आर्थिक मदत करणार असल्याचे सांगितले.