रिक्षाचालकांनी बुजविले खड्डे

रिक्षाचालकांनी बुजविले खड्डे
डोंबिवली पश्चिमेतील रस्त्यांची चाळण
सकाळ वृत्तसेवा
डोंबिवली, ता. १३ : डोंबिवली पश्चिमेतील रस्त्यांची खड्ड्यांमुळे अक्षरशः चाळण झाली आहे. त्यामुळे रस्त्यावरून प्रवास करताना चालकांना कसरत करावी लागत आहे. पालिका प्रशासनाने नेमलेले कंत्राटदार केवळ एक-दोन खड्डे बुजवितात; मात्र पुन्हा पाऊस झाला की ते खड्डे आणखी वाढतात. या खड्ड्यांतून रिक्षा चालवताना रिक्षाचालकांना अनेक शारीरिक व्याधी जडत आहेत. पाठ व कंबरदुखीचा त्रास सहन करावा लागत आहे. त्यामुळे मेटाकुटीस आलेल्या रिक्षाचालकांनी स्वतःहून खडी आणून खड्डे बुजविण्यात पुढाकार घेतला आहे.

डोंबिवली पश्चिमेतील अनेक रस्त्यांची खड्ड्यांमुळे दुर्दशा झाली आहे. सुभाष रोड ते नवापाडा रस्ता हा त्यातीलच एक आहे. या मार्गावरून प्रवास करणे म्हणजे दिव्यच ठरत आहे. दुचाकीस्वार या मार्गावरून प्रवास नको म्हणून इतर गल्लीबोळातील रस्त्यांचा वापर करून सिमेंटच्या रस्त्यांवर मार्गस्थ होत आहेत. मात्र रिक्षाचालक, अवजड वाहनचालकांना याच मार्गावरून जाणे क्रमप्राप्त आहे. या मार्गावर प्रवासी वाहतूक असल्याने चालकांना दुसऱ्या मार्गाचा अवलंब करता येत नाही. या खड्ड्यांमुळे रिक्षाचालक त्रासले आहेत. रिक्षाचालक संतोष मिरकुटे यांनी पुढाकार घेत स्वतः रिक्षातून डेब्रिज, खडी आणून खड्ड्यात भरली.

संतोष मिरकुटे याविषयी म्हणाले की प्रशासन खड्डे बुजविण्यात कमी पडत आहे. त्यामळे आता नागरिकांनीच पुढाकार घ्यायची वेळ आली आहे. सुभाष रोड ते नवापाडा हा रस्ता खड्डे पडून इतका खराब झाला आहे, की चालकांना नक्की वाहन कुठून चालवायचे असा प्रश्न पडतो. पालिका अधिकारी एसी, फॅनखाली बसून रस्त्यांची कामे सुरू आहे, खड्डे भरण्याचे काम सुरू आहे, असे म्हणतात. पालिका आयुक्त अभिनव गोयल यांनी स्वतः येऊन पाहणी करावी, जेणेकरून त्यांना या खड्ड्यांचा चालकांना काय त्रास होतो, हे समजेल असे मिरकुटे म्हणाले.

चालकांना कंबरेचा त्रास
नागरिक कर भरतात, रिक्षाचालकदेखील पासिंगच्या स्वरूपात कर भरत आहेत. पण त्या बदल्यात काही सुविधा मिळत नाहीत. चालकांना कंबरेचा त्रास सुरू झाला आहे. सगळेच रिक्षाचालक मुजोर नाहीत. आमच्यासारखे काही प्रामाणिक रिक्षाचालकदेखील आहेत. आम्हालाही समजते की आम्ही समाजाचे काही देणे लागत आहोत. त्यामुळे आज काही खड्डे बुजविण्याचे काम आम्ही केल्याचे मिरकुटे यांनी सांगितले.