भाजपाने गद्दारांना तुरुंगात टाकण्याची तयारी सुरू केली आहे; निष्ठेने पक्ष बांधणी केल्यास विजय नक्की... विनायक राऊत

भाजपने गद्दारांना तुरुंगात टाकण्याची तयारी सुरू केली आहे : विनायक राऊत

भिवंडी, ता. १३ (वार्ताहर) : ‘गद्दारांची चिंता शिवसैनिकांनी करायची नाही, भाजपने गद्दारांना तुरुंगात टाकण्याची तयारी सुरू केली आहे; त्यामुळे शिवसैनिकांनी निष्ठेने पक्षबांधणी केल्यास विजय नक्की होईल, असा विश्वास शिवसेना उद्धव बाळासाहेब ठाकरे पक्षाचे सचिव माजी खासदार विनायक राऊत यांनी रविवारी (ता. १३) व्यक्त केला.

भिवंडी शिवसेना मध्यवर्ती शाखा कार्यालयात महापालिका निवडणूक पार्श्वभूमीवर आयोजित मार्गदर्शन सभेत बोलत होते. या वेळी उपनेते विश्वास थळे, अल्ताफ शेख, ज्योती ठाकरे, जिल्हा संपर्कप्रमुख साईनाथ तारे, सहसंपर्कप्रमुख सोन्या पाटील, किशोर पवार, ग्रामीण जिल्हाप्रमुख कुंदन पाटील, शहर जिल्हाप्रमुख मनोज गगे, शहरप्रमुख प्रसाद पाटील, तालुकाप्रमुख कारसन ठाकरे, महिला शहर संघटक वैशाली मेस्त्री, महानगरप्रमुख अरुण पाटील, आशाताई रसाळ आदी मान्यवर उपस्थित होते. या वेळी विनायक राऊत म्हणाले, की ‘राज्यात स्थानिक स्वराज्य संस्थांच्या निवडणुका न घेऊन राज्य सरकारने लोकशाहीचा मुडदा पाडला आहे. तीन वर्षे प्रशासक राजवटीच्या माध्यमातून भ्रष्टाचार सुरू आहे. सहा महिन्यांत निवडणुका घेतल्या नाही तर सर्वोच्च न्यायालय यांना तुरुंगात टाकल्याशिवाय स्वस्थ बसणार नाही. लाचारीसाठी दिल्लीश्वरांचे पाय चाटणारे सत्तेवर आहेत. गुंडांचे साम्राज्य वाढले आहे, कारण गुंडांचे तारणहार राज्याच्या सत्तेवर बसले आहेत. एकनाथ शिंदे यांच्यावर आता गुवाहाटी नव्हे तर दिल्लीवारी करण्याची वेळ आली आहे. मुख्यमंत्री फडणवीस शिंदेंच्या मंत्र्यांना तुरुंगात टाकल्याशिवाय शांत बसणार नाहीत. भाजपची गरज आता संपली आहे. सगळे भाड्याने घेतले त्यांची निष्ठा काय असणार, या गद्दार गटाच्या विसर्जनाची तयारी आता भाजपने सुरू केली आहे.’