कल्याणमध्ये अघोषित भारनियमन

कल्याणमध्ये अघोषित भारनियमन
कल्याण, ता. १४ (बातमीदार) : काही दिवसांपूर्वी पडघा येथून पाल सबस्टेशनला होणारा विद्युतपुरवठा खंडित झाल्याने कल्याणमधील वीजसेवा काही तासांसाठी विस्कळित झाली होती. विद्युतपुरवठा करणारे दोन्ही फीडर निकामी झाल्याने शहर अंधारात गेले होते, तर दुरुस्तीनंतर अजूनही शहरात ठिकठिकाणी विजेचा लपंडाव सुरूच आहे. यामुळे नागरिक हवालदिल झाले आहेत.
कल्याण पूर्वेतील चिकणीपाडा, छत्रपती शिवाजी महाराज कॉलनी, श्री मलंगगड रोड, चिंचपाडा, हनुमान नगर, कोळसेवाडी, तिसगाव, विजयनगर आदी ठिकाणी मोठ्या प्रमाणावर विजेचा लपंडाव सुरू असल्याचे मागील काही दिवसांपासून पाहायला मिळत आहे, तर शहराच्या इतर काही भागातही हीच समस्या कायम आहे. वीजवाहिनी दुरुस्ती, तांत्रिक देखभाल, फीडर बदलणे अशा काही कारणामुळे महावितरण ठिकठिकाणी विजेसेवा खंडित करीत आहे. त्यामुळे हा खेळ आणखी किती दिवस चालणार, असा सवाल शहरातील नागरिकांसह व्यापारी व विद्यार्थी विचारत आहेत.